Te rejat
 

Veprimtari të zhvilluara në Shqipëri

Viti 2008

22 dhjetor 2008

Me datë 22.12.2008, Gjykata Kushtetuese dhe Gjykata e Lartë, me mbështetjen e Fondacionit gjerman Hanns Seidel, organizuan një seminar të përbashkët me temë “Kontrolli kushtetues i ankimeve individuale sipas nenit 131 germa “f” të Kushtetutës”. Gjatë zhvillimit të punimeve gjyqtarët respektiv argumentuan pikëpamje dhe debatuan mbi disa çështje të veprimtarisë vendimmarrëse dhe marrëdhënieve midis këtyre dy gjykatave. Përveç sqarimit të disa çështjeve delikate që kanë të bëjnë me rishikimin e vendimeve dhe paanshmërinë në gjykim, idetë e argumentuara gjatë zhvillimit të punimeve të seminarit u dhanë mundësi pjesëmarrësve  të diskutojnë dhe debatojnë rreth mekanizmave të mundshëm për t'a përmirësuar më tej cilësinë e vendimmarrjes dhe në veçanti sigurimin e të drejtës së mbrojtjes efektive në një proces gjyqësor. Kryetari i Gjykatës Kushtetuese shprehu mendim se asnjë gjykatë nuk mund të zëvendësojë tjetrën por e rëndësishme është që secila prej tyre të ketë në themel mbrojtjen e të drejtave të njeriut.

17 nëntor 2008

Sot më datë 17.11.2008, Kryetari i Gjykatës Kushtetuese të R.SH, Dr. Vladimir Kristo, priti në zyrën e tij zotin Hilmi Jashari, ushtrues i detyrës së Ombudspersonit në Republikën e Kosovës.

Gjatë vizitës u soll në vëmendje përvoja e legjislacionit dhe institucioneve shqiptare dhe më tej, biseda u fokusua në përpjekjet e Republikës së Kosovës për konstituimin e institucioneve kushtetuese dhe të pavarura pas hyrjes në fuqi të Kushtetutës së Kosovës.

Bashkëbiseduesit shprehën njëherësh nevojën e forcimit të bashkëpunimit mes institucioneve të R.SH dhe Republikës së Kosovës, bashkëpunim që merr rëndësi në marrëdhëniet mes dy popujve vëllezër si dhe frymëzohet nga  aspiratat e përbashkëta të dy vendeve drejt të nesërmes europiane.

Zoti Hilmi Jashari dhe delegacioni i tij u shoqërua në takim nga Avokati i Popullit të R.SH, z. Ermir Dobjani.

(FOTO)       (FOTO)

17 tetor

Sot më datë 17.10.2008, zoti Gjergji Sauli anëtar i Gjykatës Kushtetuese të Republikës së Shqipërisë, priti në mjediset e Gjykatës, zotin Selfko CRNOVRASANIN, Mbrojtësi i të Drejtave dhe Lirive të Njeriut në Republikën e Malit të Zi, i cili shoqërohej dhe nga zoti Ermir DOBJANI, Avokati i Popullit të Republikës së Shqipërisë i  cili po zhvillon një vizitë zyrtare në vendin tonë.

Takimi i cili u zhvillua në një atmosfere miqësore, u fokusua në çështjet që kanë të bëjnë me funksionin kushtetues të Avokatit të Popullit si subjekt që ve në lëvizje Gjykatën Kushtetuese, dhe në veçanti, në mbrojtjen e të drejtave, lirive dhe interesave të ligjshme të individit kur këto janë shkelur nga veprimet e administratës publike

8-10 tetor

Një delegacion i Gjykatës Kushtetuese të Bullgarisë, i kryesuar nga Kryetari i kësaj Gjykate, zoti Rumen Jankov po zhvillon një vizite pune në vendin tonë. Delegacioni, i mbërritur ne Shqipëri, në datën 8 10.2008, me ftese të homologut shqiptar, Dr. Vladimir Kristo, ka zhvilluar një takim pune në Gjykatën Kushtetuese ku është trajtuar tema: "Aspekte kryesore të procedurave dhe shqyrtimit të kërkesës që zbaton Gjykata Kushtetuese". Gjatë këtij takimi janë diskutuar probleme teknike të këtyre procedurave dhe janë sjellë përvojat nga gjyqtarët kushtetues shqiptarë dhe bullgarë.

Vizita e delegacionit kushtetues bullgar ka rëndësi në kuadër të bashkëpunimit institucional në rajonin e Ballkanit dhe shkëmbimi i eksperiencave mes dy vendeve merr  rëndësi të madhe për faktin se Shqipëria dhe Bullgaria kanë një histori të përbashkët, dalë  nga regjimet totalitare. Por Bullgaria, theksoi Kryetari Kristo, prej 2007 është anëtare e BE dhe përvoja e saj, dhe në fushën e gjykimit kushtetues është e rëndësishme në rrugën e Shqipërisë drejt BE-së.

Po të rëndësishëm e vlerësoi bashkëpunimin dhe Kryetari i Gjykatës Kushtetuese Bullgare, i cili theksoi se "... përtej jurisprudencës, gjykimi kushtetues duhet të përmbaj po kaq brenda vetes zakonet, moralin dhe arsyen e shëndoshë të çdo vendi dhe populli".

Delegacioni bullgar është pritur në takime të veçanta nga Presidenti i Republikës, zoti Bamir Topi, Ministri i Drejtësisë, z.Enkelejd Alibeaj dhe zhvilloi takime në Gjykatën e Lartë.

(FOTO)              (FOTO)

24-26 shtator 2008

Me ftesë të Gjykatës Kushtetuese të  Republikës së Shqipërisë, nga data 24-26 shtator, ka ardhur në Shqipëri një delegacion i Gjykatës Kushtetuese të Malit të Zi, kryesuar nga kryetari i kësaj gjykate, Dr.Millan Markoviç. Vizita është pjesë e bashkëpunimit mes gjykatave kushtetuese.

Gjatë vizitës u zhvillua seminari me temë: “Subjektet që vënë në lëvizje gjykatën kushtetuese”. Seminari u fokusua sidomos në vënien në lëvizje të gjykatës kushtetuese nga subjekte politike dhe nevojën e rritjes dhe përsosjes së gjykimit kushtetues. U vlerësua se vendimmarrja e Gjykatës Kushtetuese në çështjet që vijnë nga subjekte të tilla si Presidenti i Republikës, grup deputetësh apo autoritete të tjera publike dhe lokale, janë shumë të rëndësishme për jurisprudencën e secilit vend dhe respektimi i autoritetit të Gjykatës Kushtetuese është i domosdoshëm në kuadër të ndërtimit të shtetit të së drejtës.

Vizita ishte e rëndësishme dhe në kuadër të bashkëpunimit rajonal. “Jurisprudenca kushtetuese bëhet përherë e më ndërkombëtare- tha në fjalën e tij Kryetari i Gjykatës Kushtetuese të Shqipërisë, Dr. Vladimir Kristo. Kjo, por dhe objektivat e njëjta që ka Shqipëria dhe Mali i Zi për të qenë pjesë e Evropës së bashkuar, e bëjnë bashkëpunimin mes gjykatave kushtetuese pjesë të rëndësishme që ndihmon sidomos, në përqasjen e legjislacioneve me standardet e BE”.

Kurse Kryetari i Gjykatës Kushtetuese të Malit të Zi, Dr. M.Markoviç e quajti vizitën zyrtare”... jo vetëm të suksesshme, por dhe të rëndësishme në ballafaqimin me sfidat e përbashkëta që kanë dy vendet tona”.

Delegacioni malazez u prit në takime zyrtare nga Kryetarja e Kuvendit znj. Josefina Topalli dhe Ministri Drejtësisë z. Enkelejd Alibeaj. Vizita u mbështet nga fondacioni “Hans Siedel”.

(FOTO)   (FOTO)     (FOTO)  (FOTO)

17 shtator 2008 

Kryetari i Gjykatës Kushtetuese, Dr. Vladimir Kristo, priti në zyrën e tij ditën e mërkurë, datë 17.09.2008, reporterët e Komisionit të Monitorimit të Këshillit të Europës, z. David Wilshire dhe z. Jaakko Laakso. Takimi u zhvillua në kuadrin e vizitës së tyre zyrtare në Shqipëri.

Reporterët e Këshillit të Europës, morën informacion mbi mënyrën e organizimit dhe funksionimit të Gjykatës Kushtetuese dhe në veçanti u interesuan për vendimmarrjen e Gjykatës Kushtetuese në kërkesat me objekt antikushtetutshmërinë e ligjeve të ndryshme, ankimuar nga subjektet që vënë në lëvizje Gjykatën.

27 qershor 2008

Komisioni i Venecias, ka organizuar në datat 26-27 qershor 2008 takimin e nëpunësve ndërlidhës të gjykatave kushtetuese evropiane e më gjerë. Ka qenë Tirana dhe Gjykata Kushtetuese Shqiptare  pritëset e aktivitetit që synon forcimin e bashkëpunimit mes gjykatave kushtetuese.

Në seminar morën pjesë gjyqtarë dhe përfaqësues nga gjykatat kushtetuese të Evropës e më gjerë.

“Drejtësia kushtetuese e krahasuar” ishte tema ku u fokusua seminari dhe që solli në vëmendje të pjesëmarrësve përvojat e  punës së gjykatave kushtetuese. Seminari ishte njëherësh një tryezë bisedimesh mbi rrugët e përmirësimit dhe krijimit të një klime bashkëpunimi sa më të efektshëm mes gjykatave kushtetuese, bashkëpunim, i cili merr rëndësi më të madhe në kuadër të krijimit dhe zgjerimit të BE-së dhe përafrimit të legjislacioneve.

Seminarin e  përshëndeti Kryetari i Gjykatës Kushtetuese Shqiptare, z. Vladimir Kristo, i cili falënderoi Komisionin e Venecias për ndihmesën e vyer që i ka dhënë Gjykatës Kushtetuese Shqiptare në punën e saj, nëpërmjet opinioneve. “Njohja dhe shfrytëzimi i kujdesshëm i arritjeve të drejtësisë kushtetuese evropiane janë bërë, - theksoi Kryetari Kristo, - praktikë rutinore e procesit përgatitor të vendimmarjes së Gjykatës Kushtetuese”.

Më tej Kryetari dhe pjesëmarrësit në seminar ndanë të njëjtin mendim mbi nevojën e hapave të tjerë të rëndësishëm në bashkëpunimin mes gjykatave kushtetuese, dhe gjykatave kushtetuese dhe Komisionit të Venecias.

Gjykata Kushtetuese e Shqipërisë, si pjesë e organizimit të këtij seminari, u kujdes për të ofruar për pjesëmarrësit gjatë ditëve të qëndrimit dhe një tablo pozitive dhe  mbreslënëse të Shqipërisë, duke i motivuar ata për t’u rikthyer sërish në Shqipëri.

28 mars 2008

Me datë 28.03.2008, Gjykata Kushtetuese, me mbështetjen e Fondacionit gjerman Hanns Zajdel, organizuan një seminar shkëmbimi mendimesh me temë “Mbi gjykimet dhe vendimet e Gjykatës Kushtetuese”. Gjatë zhvillimit të punimeve gjyqtarët, këshilltarë dhe punonjës të sektorit studimor të Gjykatës Kushtetuese argumentuan pikëpamje dhe debatuan mbi disa çështje të veprimtarisë vendimmarrëse të Gjykatës të tilla si forma, përmbajtja  dhe struktura e paraqitjes së vendimeve, kuorumi i domosdoshëm për marrjen e vendimit, legjitimimi i organizatave  e shoqatave para Gjykatës Kushtetuese etj. Përveç sqarimit të disa çështjeve delikate që kanë të bëjnë me vendimmarrjen, idetë e argumentuara gjatë zhvillimit të punimeve të seminarit u dhanë mundësi pjesëmarrësve  të zgjerojnë horizontin për t'a përmirësuar më tej cilësinë e vendimmarrjes sipas përvojave më të mira evropiane.

21 mars 2008

Me ftesë të Kryetarit të Kontrollit të Lartë të Shtetit dhe Avokatit të Popullit të Republikës së Shqipërisë, Kontrollori i Shtetit & Ombudsmani i Shtetit të Izraelit, Z. Micha Lindenstrauss, po zhvillon në Shqipëri një vizitë pune disa ditore.

Sot, në datën 21.03.2008, Z. Micha Lindenstrauss, u prit në një takim nga Kryetari i Gjykatës Kushtetuese të Republikës së Shqipërisë, Dr. Vladimir Kristo. Takimi, i cili u zhvillua në një atmosferë mjaft miqësore, u përqendrua në çështje të organizimit të pushtetit gjyqësor të vendeve respektive, në specifikat dhe veçoritë e konceptimit dhe funksionimit të institucionit të Kontrollorit të Shtetit & Ombudsmanit në Shtetin e Izraelit, si dhe në mundësitë e thellimit të mëtejshëm të marrëdhënieve të bashkëpunimit ndërmjet institucioneve të drejtësisë të të dy vendeve.

Kryetari i Gjykatës, pasi bëri një ekspoze të mënyrës së organizimit dhe funksionimit të Gjykatës Kushtetuese evidentoi faktin se tashmë kjo Gjykatë, ndonëse me një eksperience relativisht të re, ka konsoliduar në vazhdimësi jurisprudencën e saj duke zënë një vend të rëndësishëm në institucionet kushtetuese të shtetit.

Në këtë takim, Z. Micha Lindenstrauss, shoqërohej edhe nga Avokati i Popullit i Republikës së Shqipërisë, Z. Ermir Dobjani.

1 shkurt 2008

Z. Vladimir Kristo, Kryetar i Gjykatës Kushtetuese, priti zj. Yvana Enzler, Ambasadore e Konferederatës së Zvicrës në Tiranë me kërkesë të kësaj të fundit. Kryetari Kristo informoi Ambasadoren Enzler për organizimin, funksionet, kompetencat e Gjykatës Kushtetuese dhe vendin e saj në sistemin e institucioneve kushtetuese shqiptare.

Gjatë takimit, që u zhvillua në frymë miqësore, palët shprehën vullnetin e përbashkët  për zhvillimin e marrëdhënieve dypalëshe të bashkëpunimit midis Gjykatës Kushtetuese dhe Tribunalit Federal të Zvicrës.

21 janar 2008

(FOTO)

18 janar 2008

Në datën 18.01.2008, Kryetari i Gjykatës Kushtetuese të Republikës së Shqipërisë, Dr. Vladimir Kristo, priti në ambientet e kësaj gjykate, Ambasadorin e Jashtëzakonshëm dhe Fuqiplotë të Republikës së Hungarisë në Shqipëri, SHTZ. Sandor Molnari. Takimi u zhvillua me kërkesë të vetë Ambasadorit dhe u përqëndrua në diskutimin e pikave të përbashkëta dhe dallimeve që ekzistojnë në kompetencat e dy gjykatave si dhe në nevojën e bashkëpunimit ndërmjet Gjykatës Kushtetuese të Shqipërisë dhe homologes së saj në Hungari. Në vlerësim të eksperiencës dhe rolit të Gjykatës Kushtetuese si institucioni që garanton respektimin e Kushtetutës dhe ndihmon në ndërtimin e shtetit të së drejtës, autoritetet shprehën bindjen se shkëmbimi i përvojave në fushën e drejtësisë kushtetuese dhe më gjerë, do të ndihmojë jo vetëm në veprimtarinë e këtij institucioni, por edhe në zhvillimet dhe proceset demokratike në Shqipëri.

Viti 2007

14 dhjetor 2007

Sot, në datën 14.12.2007, Kryetari i Gjykatës Kushtetuese të Republikës së Shqipërisë, Dr. Vladimir Kristo, priti në ambientet e kësaj gjykate, Ambasadorin e Shteteve të Bashkuara të Amerikës në Shqipëri, SHTZ. John Withers.

Takimi, i cili u zhvillua në një atmosferë të përzemërt, u përqendrua mbi problemet e gjyqësorit në përgjithësi dhe të reformës në drejtësi në veçanti.

Kryetari i Gjykatës, pasi bëri një ekspoze të punës së institucionit që drejton evidentoi faktin, se tashmë Gjykata Kushtetuese ka zënë vendin që i takon në hierarkinë e institucioneve të shtetit, duke ju dhënë përgjigje çështjeve të ndryshme në përputhje me Kushtetutën dhe larg ndikimeve politike.

Nga ana e tij, Ambasadori i ShBA, vlerësoi punën e deritanishme të Gjykatës Kushtetuese dhe sugjeroi që ajo të vazhdonte të jepte kontributin e saj në forcimin e shtetit të së drejtës. Duke e vlerësuar kompetencën dhe pavarësinë e gjyqësorit si një nga shtyllat e domosdoshme për pranimin e Shqipërisë në NATO, por dhenë proceset e mëtejshme integruese, Ambasadori Withers, vlerësoi të domosdoshme përshpejtimin e hapave në realizimin e reformës në drejtësi. Në këtë kuadër, z.Withers ofroi për Gjykatën Kushtetuese, mbështetje dhe ndihmë të vazhdueshme. “Ju mund të shikoni në Ambasadën tonë një aleat dhe bashkëpunëtor të sigurt...”- u shpreh Ambasadori, i cili premtoi dhe fillimin e një bashkëpunimi më konkret me Gjykatën Kushtetuese Shqiptare.

Bashkëbiseduesit ndanë të njëjtat mendime mbi faktin se ka ardhur koha që hapat e Shqipërisë të njohin një progres të ri me rezultate dhe efiçensë në objektivin madhor të konsolidimit tashmë  të shtetit të së drejtës, dhe ku padyshim roli i Gjykatës Kushtetuese ka një rol të posaçëm dhe të rëndësishëm.

(FOTO)     (FOTO)   (FOTO)

24 nëntor 2007

Gjykata Kushtetuese festoi 15 vjetorin e krijimit të saj. Në ceremoninë solemne të organizuar me këtë rast ishin të pranishëm Presidenti i Republikës, SH.T.Z. Bamir Topi, Kryetarja e Kuvendit, znj. Josefina Topalli, Kryeministri, z.Sali Berisha dhe personalitete të tjera të larta të shtetit. Në ceremoninë e këtij përvjetori, morën pjesë anëtarët dhe ish-anëtarët e Gjykatës Kushtetuese, gjyqtarë, juristë dhe përfaqësues të trupit diplomatik.

Ceremoninë e përshëndeti Presidenti i Republikës, SH.T.Z. Bamir Topi, i cili vlerësoi punën e deritanishme të Gjykatës dhe deklaroi se “...në prefeksionimin e kuadrit ligjor që do të rregullojë jetën dhe punën e institucioneve, në radhë të parë funksionimi i Gykatës Kushtetuese është mjaft i rëndësishëm”.

Në fjalën e tij, Kryetari i Gjykatës Kushtetuese, Z.Vladimir Kristo, duke referuar mbi punën e kësaj gjykate në këto 15 vjet, vlerësoi arritjet në vendimmarrjen e saj dhe e cilësoi Gjykatën Kushtetuese  si “.... faktor të rëndësishëm pozitiv në procesin e vështirë të shkëputjes nga e kaluara dhe për t’u orjentuar drejt ndërtimit të një shoqërie demokratike”.

Më tej, ish-Kryetari i  parë i Gjykatës z. Rustem Gjata, Avokati i Popullit, z.Ermir Dobjani dhe Prof. Aleks Luarasi duke evidentuar rëndësinë e Gjykatës Kushtetuese si institucion i pazëvendësueshëm i shtetit, vlerësuan kontributin e saj në forcimin e shtetit të së drejtës.

(FOTO)  (FOTO)  (FOTO)  (FOTO)  (FOTO)  (FOTO)

(FOTO)

9 nëntor 2007 

Sot, në datën 09.11.2007, Zoti Vladimir Kristo, Kryetar i Gjykatës Kushtetuese të Republikës së Shqipërisë, priti në ambientet e kësaj gjykate, Shkëlqesinë e Tij, Zotin Alibeman Eghbali Zarch, Ambasador i Jashtëzakonshëm dhe Fuqiplotë i Republikës Islamike të Iranit në Shqipëri. Takimi i iniciuar me kërkesë të vetë Ambasadorit kryesisht u fokusua në dy tema kryesore - vendosjen e urave të bashkëpunimit ndërmjet Gjykatës Kushtetuese të Shqipërisë dhe institucioneve homologe të drejtësisë në Iran, si dhe në ftesën që Zoti Seyed Mohhammad Hashemi Shahrudi, Kryetar i Pushtetit Gjyqësor në Republikën Islamike të Iranit, i drejtonte Kryetarit të Gjykatës Kushtetuese të Republikës së Shqipërisë për të marrë pjesë në Takimin e Krerëve të Vendeve Islamike që pritet të zhvillohet në Teheran, Iran, në datat 4 – 6 dhjetor 2007. Gjithashtu, autoritetet shkëmbyen përvojat dhe eksperiencat e tyre lidhur me mënyrën e organizimit dhe funksionimit të pushtetit gjyqësor në vendet respektive.

31 tetor 2007 

Një delegacioni i Gjykatës së Lartë të Republikës së Serbisë, i kryesuar nga Kryetarja e kësaj Gjykate znj. Vida Petrovic-Skero po zhvillon në Shqipëri një vizitë pune disa ditore, pjesë e programit të së cilës ka qenë edhe takimi me Kryetarin e Gjykatës Kushtetuese të Republikës së Shqipërisë, Dr.Vladimir Kristo.

Takimi u zhvillua në datën 31.10.2007, në ambientet e Gjykatës Kushtetuese. Kryetari i Gjykatës, z.Kristo, bëri një paraqitje të plotë të mënyrës së organizimit dhe funksionimit të institucionit të Gjykatës Kushtetuese, si përgjigje e interesit të treguar  nga miqtë dhe në vijim të bisedës, u trajtuan apekte të procedurave të ankimit të individëve pranë GJEDNJ, nevoja e lehtësimit të këtyre procedurave  si edhe aspekte të organizimit të sistemit gjyqësor në Republikën e Serbisë.

Kryetari Kristo, gjeti rastin të përcillte nëpëmjet Kryetares Vida Petrovic-Skero përshëndetjet për homolgun e tij serb si dhe të shprehte gadishmërinë për vendosjen e një bashkëpunimi reciprok ndërmjet dy gjykatave kushtetuese.

Në këtë takim, delegacion serb shoqërohej nga Kryetari i Gjykatës së Lartë, z Thimjo Kondi.

(FOTO)       (FOTO)

26 - 27 shtator 2007
 

Në datat 26 e 27 shtator 2007, në Hotel Tirana, u mbajt Konferenca me temë: “Përmirësimi i zbatimit të Konventës Evropiane të të Drejtave të Njeriut, nëpërmjet zgjerimit të bashkëpunimit midis institucioneve”, organizuar nga Ministria e Punëve të Jashtme dhe Këshilli i Evropës.

Lektorë të zgjedhur nga vende anëtare të Këshillit të Evropës dhe nga instituciont qendrore të vendit tonë  paraqitën eksperiencat e bashkëpunimit ndërinstitucional me Gjykatën Evropiane të të Drejtave të Njeriut. Punimet e Konferencës u ndoqën me interes të posaçëm nga përfaqësues të institucvioneve Kushtetuese, si nga Kuvendi, Gjykata Kushtetuese, Gjykata e Lartë, Avokati I Pupulliy, Ministra e Punëve të Jashtme dhe ajo e Arsimit dhe Shklkencës, përfaqësues organizatash jo qeveritare etj. Në punimet e Konferencës, morën pjesë, me cilësinë e të ftuarve dhe të referuesve edhe z. Vladimir Kristo, Kryetar i Gjykatës Kushtetuese dhe z. Xhezair Zaganjori, anëtar i kësaj Gjykate. 

Kryetari Kristo mbajti referatin me temë “Kontrolli kushtetues i pajtueshmërisë së legjislacionit me standartet e KEDNJ”, duke nënvizuar faktin, se “Kushtetuta dhe KEDNJ, kanë kaq shumë pika takimi, sa që të arrish në përfundimin se një ligj është i papajtueshëm me Kushtetutën, pa hezitim mund të thuash se ai është i papajtueshëm dhe me standardet e KEDNJ-së”.

Gjyqtari kushtetues Zaganjori,  mbajti referatin me temë “Efektiviteti i mjeteve të brendshme të sistemit shqiptar në kuptim të nenit 13 të KEDNJ”.

20 qershor 2007

Sot, në datën 20.06.2007, Zoti Vladimir Kristo, Kryetar i Gjykatës Kushtetuese të Republikës së Shqipërisë, priti në ambientet e kësaj gjykate, Shkëlqesinë e Tij, Zotin Manuel Montobbio, Ambasadorin e Parë rezident të Spanjës në Shqipëri. Takimi i iniciuar me kërkesë të vetë Ambasadorit, kryesisht u fokusua në thellimin e mëtejshëm të bashkëpunimit ndërmjet Gjykatës Kushtetuese të Shqipërisë dhe homologes së saj në Spanjë, Tribunalit Kushtetues. Në vlerësim të eksperiencës dhe rolit të deritanishëm të Gjykatës Kushtetuese të Shqipërisë si institucioni që garanton respektimin e Kushtetutës dhe bën interpretimin përfundimtar të saj, autoritetet shprehën bindjen se shkëmbimi i përvojave në fushën e drejtësisë kushtetuese dhe më gjerë do të ishte si në interes të veprimtarisë së këtij institucioni të rëndësishëm të shtetit të së drejtës, ashtu edhe në interes të zhvillimeve dhe proceseve demokratike në Shqipëri.

Kryetari i Gjykatës Kushtetuese vlerësoi me nota pozitive veprimtarinë vendimmarrëse të institucionit që ai drejton dhe bëri një prezantim të mundësive për përmirësime në të ardhmen, për të kryer me korrektesë dhe përgjegjësi misionin e rëndësishëm që i ka ngarkuar Kushtetuta, jashtë ndikimeve politike dhe për të ndihmuar në progresin e arritur në rrugën e integrimit të vendit tonë në BE.

(FOTO)

10 maj 2007

Me ftesë të Gjykatës Kushtetuese të Shqipërisë ka ardhur për një vizitë dy ditore në Shqipëri një delegacion i Gjykatës Kushtetuese të Maqedonisë,  kryesuar nga kryetari i saj, z.Mahmut Jusufi. Vizita, është në kuadrin e takimeve bilaterale dhe konsultative mes dy institucioneve dhe u mbështet nga fondacioni gjerman në Shqipëri HANNS SEIDEL. Në takimet dy ditore u shkëmbyen përvoja në fushën e drejtësisë kushtetuese dhe njëherësh u evidentuan dallimet dhe të përbashkëtat e gjykimit kushtetues në të dy vendet. Një pjesë e diskutimeve u orjentua dhe në aspektet e kontrollit individual të drejtësisë kushtetuese si pjesë e rëndësishme e punës së gjykatave kushtetuese.

Gjatë diskutimeve, kryetari i Gjykatës Kushtetuese të Republikës së Maqedonisë Mahmut Jusuf, e quajti mjaft të rëndësishme këtë vizitë. Ai shtroi nevojën e takimeve me të shpeshta dhe bashkëpunuese mes gjykatave kushtetuese të vendeve tona, si nevojë e diktuar dhe nga aspirata e përbashkët e Shqipërisë dhe Maqedonisë drejt BE.  “Takime të tilla do të na ndihmojnë jo vetëm të përsosim punën tonë mes shkëmbimit të eksperiencave cilësore, por dhe në përafrimin e legjislacioneve” u shpreh zoti M.Jusufi.

Pjesë e axhendës së ngjeshur ishte dhe takimi me Presidentin e Republikës Alfred Moisiu, ku u gjet e përbashkët ideja mbi rolin e rëndësishëm të gjykatave kushtetuese si garante të Kushtetutës. 

Në përfundim të vizitës dy ditore në Shqipëri, kryetari i Gjykatës Kushtetuese të Maqedonisë ftoi Kryetarin e Gjykatës Kushtetuese Shqiptare, zotin Gjergji Sauli për një vizitë në Republikën e Maqedonisë, në kuadrin e marrëdhënieve bilaterale të gjykatave kushtetuese në rajon e më gjerë.

(FOTO)           (FOTO)          (FOTO)

Takim me Ambasadorin e Greqisë në Tiranë

Në datën 16 janar 2007, Zoti Gjergji Sauli, Kryetar i Gjykatës Kushtetuese të Republikës së Shqipërisë priti në një vizitë kortezie në ambientet e kësaj gjykate, Shkëlqesinë e Tij, Zotin Constantin Kokossis, Ambasador i Republikës së Greqisë në Tiranë. Gjatë këtij takimi, dy personalitet zhvilluan një bisedë mjaft miqësore dhe diskutuan midis të tjerash edhe mundësinë e shkëmbimit të vizitave mes gjykatave homologe respektive, si për anëtarët e gjykatës kushtetuese ashtu edhe për stafin e saj.

Takim me Ambasadorin e Spanjës në Tiranë

Zoti Gjergji Sauli, Kryetar i Gjykatës Kushtetuese të Republikës së Shqipërisë priti në ambientet e kësaj gjykate, në datën 01.02.2007, Shkëlqesinë e Tij, Zotin Manuel Montobbio, Ambasadorin e Parë të Spanjës në Shqipëri. Pasi bënë një ekspoze të veprimtarisë dhe kompetencave të Gjykatës Kushtetuese në Shqipëri dhe homologes së saj në Spanjë, Tribunalit Kushtetues, autoritetet eksploruan mundësitë e  vazhdimësisë dhe promovimit të mëtejshëm të marrëdhënieve midis këtyre dy institucioneve si nëpërmjet vizitave studimore për shkëmbim eksperiencash, ashtu edhe nëpërmjet organizimit të veprimtarive të përbashkëta. 

Viti 2006
 

TIRANË, 27 tetor 2006

Presidenti Moisiu dekoron zotin Kristofor Andrea Peçi me Medaljen "Për Merita të Veçanta Civile".

 
Presidenti i Republikës, Alfred Moisiu, i akordoi zotit Kristofor Andrea Peçi Medaljen "Për Merita të Veçanta Civile" me motivacionin: "Për kontribut shumëvjeçar në organet e drejtësisë, për pjesëmarrje dhe veprimtari aktive në procesin e reformimit demokratik të tyre”.

  (Foto)

TIRANË, 21 qershor 2006

Prezenca e OSBE-së në Shqipëri dhe Gjykata Kushtetuese promovuan gjatë një ceremonie të zhvilluar në ambientet e kësaj gjykate botimin e dy vëllimeve, që përmbajnë debatet e zhvilluara gjatë procesit të hartimit të Kushtetutës së Shqipërisë. Debatet e transkriptuara në botimin “Debati Kushtetues” janë zhvilluar në komisionin e posaçëm parlamentar për hartimin e projektkushtetutës, gjatë periudhës mars-shtator 1998.

Në këtë ceremoni promovuese muarën pjesë Kryetari i Prezencës së OSBE-së në Shqipëri, Zoti Pavel Vacek, anëtarë të ish komisionit parlamentar për hartimin e projektkushtetutës, anëtarët e Gjykatës Kushtetuese, si dhe figura të tjera të shquara në fushën e drejtësisë. Në fjalën e tij të hapjes së kësaj ceremonie, Ambasadori Vacek, midis të tjerash tha: “Ne shpresojmë që ky botim të jetë i dobishëm për anëtarët ë Gjykatës Kushtetuese dhe gjyqtarë e juristë të tjerë, sikurse edhe për studiuesit, studentët e fakultetit të drejtësisë, si dhe individët dhe institucionet e interesuara për çështjet kushtetuese dhe procesin e hartimit të ligjeve.”

Në fjalën e tij, Kryetari i Gjykatës Kushtetuese, Zoti Gjergji Sauli, duke e vënë theksin mbi vlerat që mishëron Kushtetuta jonë, si dhe mbi misionin e rëndësishëm të respektimit dhe garantimit të saj, u shpreh se: “Në Kushtetutë, janë reflektuar vlera universale të një shoqërie demokratike gjithmonë e në ndryshim, prandaj ajo vlerësohet si një dokument juridik me rëndësi të veçantë që i ka shërbyer dhe i shërben popullit tone në rrugën e tij drejt progresit. Shpreh bindjen time se përmbushja si duhet prej institucionit tonë te misionit të tij kushtetues do t'i shërbejë përshpejtimit të procesit për zhvillimin e reformave demokratike dhe të integrimit te plotë euroatlantik të vendit.”

Botimi përbëhet prej dy vëllimesh, të cilat u përgatitën pas sistemimit, transkriptimit dhe redaktimit të materialeve të inçizuara në kasetë, të cilat janë në zotërim të Zyrës Ligjore të Prezencës së OSBE-së. Librat do t’u shpërndahen institucioneve shtetërore, gjykatave, Shkollës së Magjistraturës, avokatëve, studiuesve dhe organizatave të interesuara për çështje të shtetit të së drejtës. Gjithashtu, “Debati Kushtetutes” do t’i dhurohet bibliotekave publike në të gjithë Shqipërinë.

(Foto)

TIRANË, 13 qershor 2006

Gjykata Kushtetuese në bashkëpunim me Fondacionin IRZ organizoi në dt. 13.06.2006, seminarin me temë: " Kundërshtimi indirekt i akteve normative në Gjykatën Kushtetuese nga individët".

Seminari, u fokusua mbi mundësitë që kanë individët  për zgjerimin e hapësirave të ankimit pranë Gjykatës Kushtetuese, si një instrument për kontrollin e kushtetueshmërisë së akteve. Tematika interesante, përfshiu në diskutime frytdhënëse pjesëmarrësit e shumtë.

(Foto)           (Foto)

Kryetari i Gjykatës Kushtetuese, Zoti Gjergji Sauli, në datën 5.12.2006, zhvilloi një takim pune me juristët amerikanë, zotërinjtë. avokat Roger Sherrard, dhe gjyqtarët Paul Manguson dhe Bob Uter, të ardhur në vendin tonë në kuadër të Konferencës Gjyqësore,

            Zoti Sauli, pasi ju uroj miqve  mirëseardhjen, bëri një paraqitje mbi veprimtarinë vendimmarrëse të Gjykatës Kushtetuese. Duke prezantuar larminë dhe rëndësinë e çështjeve të shqyrtuara gjatë këtij viti, Ai e vuri theksin tek fakti se çdo arritje në fushën e vendimmarrjes e ka bazën tek profesionalizmi duke u mbështetur në Kushtetutën e Republikës së Shqipërisë, larg të qenurit palë e politikës dhe korrenteve të saj . Vendimet tona, theksoi zoti Sauli, nuk kanë qenë vetëm akte që i kanë dhënë zgjidhje çështjeve të shqyrtuara, por edhe që kanë pasuruar jurisprudencën kushtetuese shqiptare.

            Juristët amerikanë, pasi theksuan domosdoshmërinë e pavarësisë së gjyqësorit dhe të luftës kundër shfaqjeve të korrupsionit në sistemin e drejtësisë, shprehën konsideratën e veçantë për cilësinë e lartë dhe qartësinë e vendimeve të Gjykatës Kushtetuese si dhe përgëzuan gjyqtarët e kësaj Gjykate për kompetencën profesionale të treguar në marrjen e vendimeve për  çështje mjaft të rëndësishme, duke shprehur besimin se do të vazhdohet të ecet edhe në të ardhmen me këtë vendosmëri. Ata kërkuan që konsideratat e tyre  t'u transmetohen të gjithë gjyqtarëve të Gjykatës Kushtetuese.

            Kryetari, zoti Gjergji Sauli, u shpjegoi kolegëve amerikanë se vendimet e Gjykatës Kushtetuese janë produkt kolektiv, pasi çdo vendim, para se të shpallet i nënshtrohet paraprakisht një diskutimi të vëmendshëm të të gjithë trupës gjyqësor. Për sa i takon pavarësisë së gjyqësorit dhe luftës kundër korrupsionit në drejtësi, zoti Sauli theksoi se reforma që mendohet të bëhet duhet të jetë e studiuar dhe e menduar mirë në të gjitha aspektet, ku padyshim rol pozitiv, krahas të tjerave, do të luante dhe përmirësimi i nivelit të pagave për gjyqtarët, prokurorët dhe administratën gjyqësore.

 (Foto)