Veprimtaritë Ndërkombëtare për vitin 2008
 

3-5 tetor 2008

Në datat 3-5 tetor 2008, Gjykata Kushtetuese e Republikës së Armenisë, në bashkëpunim me Komisionin e Venecias organizoi Konferencën e XIII Ndërkombëtare të Erevanit.

Kjo është një Konferencë e përvitshme, që synon të mbledhë në një tryezë debati dhe shkëmbimi profesional gjyqtarë dhe akademikë të së drejtës kushtetuese.

Tema e përzgjedhur këtë radhë titullohej “Vlerat kryesore kushtetuese dhe praktika publike”.

Në këtë Konferencë, Gjykata Kushtetuese e Republikës së Shqipërisë u përfaqësua nga gjyqtari Sokol Berberi dhe këshilltari ligjor Denar Biba (zyrtari ndërlidhës i kësaj gjykate me Komisionin e Venecias). Gjyqtari Berberi mbajti me këtë rast temën “Mbrojtja e vlerave kushtetuese nga shoqëria civile nëpërmjet kontrollit kushtetues” e cila u vlerësua nga të gjithë pjesëmarrësit, si për origjinalitetin ashtu edhe për këndvështrimin e pa artikuluar nga të tjerët.

Konferenca ishte një rast i shkëlqyer për shkëmbimin e përvojës, pasurimin doktrinar dhe njohjen personale ndërmjet profesionistëve të së drejtës kushtetuese.

  (FOTO)               (FOTO)              (FOTO)

8 korrik 2008

Trupa gjyqësore e Gjykatës Kushtetuese të Shqipërisë, e kryesuar nga Kryetari i saj Vladimir Kristo gjendet për një vizitë disaditore në Gjykatën Evropiane të të Drejtave të Njeriut në Strasburg.  Sot gjyqtarët kushtetues shqiptarë janë pritur nga Kryetari i Gjykatës Evropiane të të drejtave të Njeriut, zoti Jean-Paul Costa.

Gjatë bisedimeve është evidentuar dhe fakti i kërkesave gjithnjë në rritje të individëve shqiptarë drejt Strasburgut. Kryetari Jean –Paul Costa vuri theksin në nevojën e marrjes së masave nga shteti shqiptar për të ekzekutuar vendimet përfundimtare të gjykatave, në mënyrë që në Gjykatën e Strasburgut të shkojnë sa më pak kërkesa me objekt të tillë.
 

19-21 qershor

Me ftesë të Gjykatës Kushtetuese të Malit të Zi, një delegacion i Gjykatës Kushtetuese Shqiptare, i kryesuar nga Kryetari i kësaj Gjykate, zoti Vladimir Kristo  nga data 19-21 qershor zhvilloi një vizitë zyrtare në Malin e Zi. Gjatë vizitës u diskutua mbi probleme të drejtësisë kushtetuese dhe u shkëmbyen eksperiencat mes dy gjykatave. Delegacioni i Gjykatës Kushtetuese Shqiptare, është pritur  dhe nga President i Malit të Zi, zoti Filip Vujanoviq.

(FOTO)      (FOTO)    (FOTO)    (FOTO)

2-7 Qershor 2008, Vilnius, Lituani

Në Kongresin e XIV të Konferencës së Gjykatave Kushtetuese Europiane, që u zhvillua në Vilnius të Lituanisë në datat 2-7 Qershor 2008, morën pjesë delegacione nga 39 vendet anëtare – anëtare të plota të Konferencës, një delegacion nga anëtarët e asociuar, mbikqyrës nga shtetet e Europës, Amerikës Qëndrore dhe Jugore. Azisë dhe Afrikës, si dhe të ftuar nga Gjykatat e e Drejtësisë dhe Gjykata e Shkallës së Parë e Komuniteteve Europiane, Gjykata Europiane e të Drejtave të Njeriut si dhe Komisioni Europian për Demokracinë përmes Ligjit (“Komisioni i Venecias”). Në këtë Kongres morën pjesë dhe përfaqësues të Gjykatës Kushtetuese të Republikës së Shqipërisë: Xhezair Zaganjori - Gjyqtar i Gjykatës Kushtetuese, Sokol Sadushi - Gjyqtar i Gjykatës Kushtetuese, Brunilda Bara - Drejtore e Drejtorisë së Administratës Gjyqësore të Gjykatës Kushtetuese.

Tema e Kongresit të XIV të Konferencës, – “Probleme të ometimit ligjor në jurisprudencën kushtetuese” – hartuar për problemin e kompetencës së institucioneve të drejtësisë kushtetuese për të diskutuar rreth kushtetutshmërisë së mungesave ligjore. Lidhur me këtë, vendeve anëtare të Konferencës u ishte shpërndarë më parë një pyetësor, ku, mbi bazën e përgjigjeve të ardhura nga raportet kombëtare të vendeve anëtare, ishte hartuar më pas një raport i përgjithshëm lidhur me ketë problem. Në raportin e përgjithshëm theksohej se formimi i doktrinës kushtetuese lidhur me mungesat legjislative reflekton një tendencë të përgjithshme të drejtësisë kushtetuese Europiane, që konsiston në forcimin e mbrojtjes së bazave kushtetuese në sistemin ligjor. Në raportin e përgjithshëm theksohej se hetimi dhe konstatimi i ometimit ligjor është një mjet i kontrollit kushtetues, gjë që ndihmon në sigurimin e supremacisë së Kushtetutës, në harmonizimin e sistemit ligjor si dhe në një mbrojtje me të mirë të të drejtave kushtetuese dhe lirive të individit.

Diskutimet e pjesëmarrësve në Kongres treguan për një shumëllojshmëri të praktikës së institucioneve të drejtësisë kushtetuese lidhur me problemet e mungesave ligjore. Shumica e përfaqësuesve të gjykatave kushtetuese që folën gjatë diskutimeve theksuan, se hetimi i ometimeve legjislative është një aspekt i rëndësishëm në sigurimin e kushtetutshmërisë së ligjit.

Objekti i diskutimit të delegacionit shqiptar në këtë konferencë ishte: “Ometimi ligjor si koncept kushtetues në këndvështrimin e Gjykatës Kushtetuese të Republikës së Shqipërisë”.

Në takimin e Rrethit të Presidentëve në Kongresin e XIV të Konferencës së Gjykatave Kushtetuese Europiane u vendos gjithashtu që të pranohej Gjykata e Lartë e Principatës së Monakos si anëtare e plotë e kësaj Konference.

Zhvillimi i Kongresit të XV të Konferencës së Gjykatave Kushtetuese Europiane u vendos të bëhet në vitin 2011 në Bukuresht (Rumani). Takimi Përgatitor i Rrethit të Presidentëve do të mbahet në javën e parë të Tetorit 2009 në Bukuresht.

Ceremonia e vitit të ri gjyqësor në Gjykatën e Strasburgut, 25 janar 2008

Me ftesë të z. Zhan-Pol Kosta, Kryetar i Gjykatës Evropiane për të Drejtat e Njeriut, Z. Vladimir Kristo, Kryetar i Gjykatës Kushtetuese, mori pjesë në ceremoninë e hapjes së vitit të ri gjyqësor të kësaj Gjykate, e cila u zhvillua në Strasburg me datë 25 janar 2008. Kryetari Kristo asistoi gjithashtu në punimet e seminarit me temë “Roli i konsensusit në sistemin e Konventës Evropiane për të Drejtat e Njeriut”, organizuar nga ajo Gjykatë. Të ftuar për të marrë pjesë në këto veprimtari ishin edhe kryetarë e gjyqtarë gjykatash kushtetuese e të larta të vendeve anëtare të Këshillit të Evropës.

Gjatë seancave të seminarit dhe të ceremonisë solemne, Kryetari Kristo zhvilloi takime informale me përfaqësues të disa gjykatave kushtetuese  evropiane, me të cilët u shkëmbyen mendime për çështje të bashkëpunimit dhe të shkëmbimit të përvojave  midis gjykatave kushtetuese.   

Veprimtaritë Ndërkombëtare për vitin 2007

Konferenca Ndërkombëtare me temë “Konstitucionalizmi i jetës politike dhe ligjore: Roli i Gjykatave Kushtetuese”, 6 - 7 dhjetor 2007, Bukuresht, Rumani

Në datat 6 dhe 7 dhjetor u zhvillua në Bukuresht, Rumani, konferenca ndërkombëtare me temë “Konstitucionalizmi i jetës politike dhe ligjore: Roli i Gjykatave Kushtetuese”, veprimtari e cila u organizua nga Gjykata Kushtetuese e Rumanisë me rastin e 15-të vjetorit të krijimit të kësaj Gjykate. Në këtë konferencë morën pjesë kryetarë dhe anëtarë të gjykatave kushtetuese dhe të gjykatave të larta të vendeve europiane si dhe akademikë në fushën e të drejtës kushtetuese. Nga Shqipëria mori pjesë z.Sokol Berberi, anëtar i Gjykatës Kushtetuese.

Nga pjesëmarrësit në konferencë u sollën eksperiencat e vendeve përkatëse lidhur me rolin e rëndësishëm dhe në rritje që luajnë Gjykatat Kushtetuese në jetën politike dhe ligjore.  Theksi u vu në rolin që luajnë këto Gjykata për respektimin e lirive dhe të drejtave të njeriut, të shtetit të së drejtës, të parimit të ndarjes dhe balacimit të pushteteve dhe të demokracisë. Nga disa pjesëmarrës u prezantuan, sipas një vështrim krahasues, dhe tendecat lidhur me raportet e juridiksionit kushtetues të vendit me juridiksionin e të drejtës europiane. Gjatë prezantimeve, i’u kushtua vëmendje dhe çështjes së forcimit të legjitimitetit dhe efektivitetit të vendimeve të gjykatave kushtetuese.

Z. Sokol Berberi bëri një prezantim me shkrim lidhur me eksperiencën dhe rolin e Gjykatës Kushtetuese shqiptare në drejtim të ndikimit mbi ligjvënësin dhe politikën. Në prezantimin e tij u trajtuan këto çështje: juridiksioni i Gjykatës Kushtetuese shqiptare për kontrollin e kushtetutshmërisë së ligjeve në planin normativ, disa çështje të debatueshme nga doktrina; subjektet që e vënë në lëvizje Gjykatën dhe se si kanë ndikuar ose mund të ndikojnë në rolin e Gjykatës këta faktorë; dhe disa aspekte të disponibilitetit dhe juridiksionit kushtetues në interpretimet e Gjykatës.

Konferencë Multilaterale, 30 tetor – 2 nëntor 2007

Fondacioni Gjerman IRZ (Fondacioni Gjerman për Bashkëpunimin Ligjor Ndërkombëtar) organizoi në Dubrovnik, Kroaci, në datat 30 tetor – 2 nëntor 2007, Konferencën Multilaterale me temë “E drejta procedurale penale në një Europë që po bashkohet”, e cila këtë vit kishte si qëllim shkëmbimin e përvojave të vendeve të ndryshme të Europës Juglindore lidhur me kuadrin ligjor në fushën e procedurës penale, duke synuar arritjen e standardeve europiane nga vendet që aspirojnë të jenë anëtare të Bashkimit Europian. Në këtë veprimtari, Gjykata Kushtetuese e Shqipërisë u përfaqësua nga Zoti Xhezair Zaganjori, anëtar i Gjykatës Kushtetuese, dhe Znj. Arta Vorpsi, këshilltare e gjyqtarëve.

Vizitë në Maqedoni e delegacionit të Gjykatës Kushtetuese, 17-19 tetor 2007

Me ftesë të Kryetarit të Gjykatës Kushtetuese të Maqedonisë, z. Mahmut Jusufi,  një delegacion i Gjykatës Kushtetuese i kryesuar nga z. Vladimir Kristo, Kryetar, zhvilloi nga data 17 deri me 19 tetor 2007, një vizitë në vendin fqinj. Gjatë takimeve të zhvilluara, delegacionet e gjykatave kushtetuese të të dy vendeve shkëmbyen përvojat e tyre në fushën e organizimit dhe të funksionimit të institucioneve përkatëse, në fushën e kontrollit të pajtueshmërisë së ligjit me Kushtetutën dhe diskutuan veçanërisht për çështje të kontrollit kushtetues për mbrojtjen e të drejtave dhe lirive themelore të individëve. Gjatë kësaj vizite, delegacioni u prit nga z. Branko Crvenkovski, President i Republikës së Maqedonisë, i cili zhvilloi një bisedë të ngrohtë e miqësore me delegacionin e Gjykatës Kushtetuese. Gjatë bisedës u theksua se gjykatave kushtetuese u takon të luajnë rol shumë të rëndësishëm në kuadër të përçapjeve për integrimin evropian të të dy vendeve. Delegacioni u prit në takim të veçanta edhe nga z. Besim Dogani, Nënkryetar i Parlamentit të Maqedonisë, dhe z. Sasho Vasilievski, Zëvendësministër i Drejtësisë.
 

(FOTO)   (FOTO)  (FOTO)  (FOTO)  (FOTO)
 

Konferenca e 12-të Ndërkombëtare Erevan, Armeni, 5-6 tetor 2007

Një delegacion i Gjykatës Kushtetuese të Republikës së Shqipërisë, i përbërë nga z.Kujtim Puto, anëtar, dhe zj.Ela Elezi, specialiste në Drejtorinë e Marrëdhënieve Ndërkombëtare, mori pjesë në konferencën gjyqësore dy ditore me temë “Përvoja ndërkombëtare e bashkëpunimit ndërmjet gjykatave kushtetuese dhe institucioneve të Ombusmanit në fushën e sigurimit dhe mbrojtjes së të drejtave të njeriut”, organizuar nga Gjykata Kushtetuese e Republikës së Armenisë, Komisioni i Venecias dhe Avokati i Popullit të Republikës së Armenisë, e cila zhvilloi punimet në Erevan, Armeni, në datat 5-6 tetor 2007.

Midis raporteve të tjera të mbajtura në këtë veprimtari, një vend të rëndësishëm zuri edhe fjalimi i gjyqtarit nga Shqipëria, z.Kujtim Puto, i cili kryesisht u fokusua mbi legjitimimin e Avokatit të Popullit dhe marrëdhënien kushtetuese midis Gjykatës Kushtetuese dhe Avokatit të Popullit.

Në këtë konferencë merrte pjesë edhe Avokati i Popullit të Republikës së Shqipërisë, z.Ermir Dobjani.

Vizitë studimore në Athinë, Greqi, 20 – 21 shtator 2007

Në datat 20 dhe 21 shtator 2007, një delegacion i Gjykatës Kushtetuese të Republikës së Shqipërisë, i kryesuar nga Kryetari i kësaj Gjykate, Dr. Vladimir Kristo, dhe i përbërë nga Z. Hajredin Fuga, Këshilltar i Kryetarit, dhe Z. Kujtim Osmani, Sekretar i Përgjithshëm, zhvilloi në Athinë, Greqi, një vizite studimore 2 ditore që përmbante në agjendën e saj takime me homologë dhe personalitete të tjera të shquara të shtetit fqinj grek në fushën e drejtësisë.

Gjatë kësaj vizite, delegacioni i Gjykatës Kushtetuese zhvilloi takime me Kryetarin e Këshillit të Shtetit të Republikës së Greqisë, Zotin Georgios Panagiotopoulos, Kyetarin e Gjykatës së Lartë – Areios Pagos, Zotin Romilos Kedikoglou, si dhe takime me funksionarë të nivelit të lartë të Ministrisë së Drejtësisë të Greqisë. Në këto takime, autoritet shkëmbyen përvojat dhe eksperiencat e vendeve të tyre lidhur me organizimin dhe funksionimin e institucioneve respektive, në frymën e zhvillimit të mëtejshëm të marrëdhënieve të bashkëpunimit të ndërsjelltë ndërmjet këtyre institucioneve të rendësishme të shtetit të së drejtës.

Në pritjen e organizuar në Këshillin e Shtetit të Republikës së Greqisë ishte i pranishëm dhe Ambasadori i Republikës së Shqipërisë në Greqi, Sh.T.Z. Vili Minarolli.
 

(FOTO)    (FOTO)  (FOTO)

Takimi i 18-të i Përvitshëm i Grupit Europian të së Drejtës Publike dhe Konferenca Ndërkombëtare 2 ditore, Athinë, Greqi, 14 – 18 shtator 2007

Me ftesë të Prof. Spyridon Flogaitis, Drejtor i Qendrës Europiane për të Drejtën Publike, Z. Xhezair Zaganjori, anëtar i Gjykatës Kushtetuese, ka përfaqësuar institucionin e Gjykatës Kushtetuese të Republikës së Shqipërisë në Takimin e 18-të të Përvitshëm të Grupit Europian të së Drejtës Publike me temë “Siguria Europiane”, si dhe në Konferencën 2 ditore me temë “Masat Kombëtare për Mbrojtjen e të Drejtave të Njeriut”, veprimtari të organizuara nga Qendra Europiane për të Drejtën Publike, dhe të zhvilluara në Athinë, Greqi, në datat 14 – 18 shtator 2007.
 

Konferenca Ndërkombëtare për 10 vjetorin e themelimit të Gjykatës Kushtetuese të Gjeorgjisë, 6 – 7 korrik 2007

Me ftesë të Z. George Papuashvili, Kryetar i Gjykatës Kushtetuese të Gjeorgjisë, një delegacion i Gjykatës Kushtetuese të Republikës së Shqipërisë i përbërë nga Z. Fehmi Abdiu, anëtar i Gjykatës, dhe Zj. Ela Elezi, specialiste në Drejtorinë e Marrëdhënieve Ndërkombëtare, ka marrë pjesë në punimet e Konferencës Ndërkombëtare me temë: “Juridiksioni i Gjykatës Kushtetuese dhe GJEDNJ në zonat e konflikteve,” e cila është organizuar nga Gjykata Kushtetuese e Gjeorgjisë në bashkëpunim me Komisionin e Venecias e institucione të tjera partnere dhe është zhvilluar në Batumi, Gjeorgji, në datat 6 – 7 korrik 2007.    
 

Kongresi i 9-të Ndërkombëtar për të Drejtën Europiane dhe Kushtetuese të Krahasuar, 29 – 30 qershor 2007

Në datat 29 – 30 qershor 2007, Z. Sokol Berberi, anëtar i Gjykatës Kushtetuese të Republikës së Shqipërisë ka marrë pjesë në punimet e Kongresit të 9-të Ndërkombëtar për të Drejtën Europiane dhe Kushtetuese të Krahasuar, zhvilluar në Universitetin e Regensburg, Gjermani. Kjo veprimtari mbledh gjyqtarë nga gjykatat kushtetuese kombëtare dhe europiane, si dhe profesorë të universiteteve të ndryshme europiane, të cilët këtë vit kanë shkëmbyer përvojat dhe mendimet e tyre për 2 tema të rëndësishme – Identiteti Kombëtar dhe Rajonal dhe Integrimi Mbikombëtar: Zhvillimet kushtetuese dhe europiane në Europën Juglindore, si dhe Kushtetueshmëria e së drejtës private: Zhvillimet e fundit.
 

Takimi i 6-të i Këshillit Mikst për Drejtësinë Kushtetuese, 29 – 30 maj 2007

Në datat 29 e 30 maj 2007, u mbajt në Venecia, Itali, mbledhja e 6-të e këshillit mikst për drejtësinë kushtetuese të Komisionit të Venecias. Në punimet e kësaj mbledhje morën pjesë Zoti Luan Pirdeni, drejtor i Studimeve, Informimit dhe Publikimeve në Gjykatën Kushtetuese dhe nëpunës ndërlidhës me Komisionin e Venecias, dhe Zonja Zyhra Sharofi, shefe e Zyrës së Protokoll – Arkivit.
 

Konferenca e 15-të Gjyqësore Ndërkombëtare, 16 – 19 maj 2007 

Me ftesë të Fondacionit të Familjes Furth dhe Fakultetit të Drejtësisë të Universitetit të Miçiganit, një delegacion i Gjykatës Kushtetuese të Republikës së Shqipërisë i përbërë nga Zoti Xhezair Zaganjori dhe Zoti Sokol Sadushi, anëtarë të Gjykatës Kushtetuese, dhe Zonja Alma Çomo, drejtore e Marrëdhënieve Ndërkombëtare, mori pjesë në punimet e Konferencës së 15-të Gjyqësore, e cila i zhvilloi punimet në Ann Arbor, Michigan, U.S.A., në datat 16 – 19 maj 2007.
 

45 vjetori i Gjykatës Kushtetuese të Turqisë, 25 – 28 prill 2007

Një delegacion i Gjykatës Kushtetuese të Republikës së Shqipërisë i përbërë nga Zoti Alfred Karamuço dhe Zoti Kristofor Peçi, anëtarë të Gjykatës Kushtetuese, mori pjesë në Simpoziumin Ndërkombëtar me temë: “Roli i gjykatave kushtetuese për paqen universale dhe civilizimin,” i cili u organizua edhe në kuadër të 45 vjetorit të themelimit të Gjykatës Kushtetuese të Turqisë dhe i zhvilloi punimet në Ankara, Turqi, në datat 25 – 28 prill 2007.
 

Hapja e vitit gjyqësor 2007 – 19 janar 2007

Me ftesë të Zotit Luzius Wildhaber, Kryetar i Gjykatës Europiane të të Drejtave të Njeriut, Zonja Vjollca Meçaj, anëtare e Gjykatës Kushtetuese të Shqipërisë, mori pjesë në ceremoninë për hapjen e vitit gjyqësor 2007 dhe në seminarin e organizuar me këtë rast, veprimtari të cilat u zhvilluan në Strasburg, Francë, më 19 janar 2007.

VITI  2006

Seminar mbi “Garancitë për Pavarësinë e Gjyqtarëve Kushtetues”, 23 – 25 nëntor 2006

Me ftesë të Zotit Ioan Vida, Kryetar i Gjykatës Kushtetuese të Rumanisë, një delegacion i Gjykatës Kushtetuese të Shqipërisë i përbërë nga Dr. Fehmi Abdiu anëtar i Gjykatës Kushtetuese, dhe Zonja Arta Vorpsi, Këshilltare Ligjore, morën pjesë në Seminarin me temë “Garancitë për Pavarësinë e Gjyqtarëve Kushtetues”, i cili u organizua nga Gjykata Kushtetuese e Rumanisë dhe Komisioni i Venecias dhe u zhvillua në Bukuresht, Rumani, në datat 23 – 25 nëntor 2006. 
 

Konferencë Multilaterale, 13 – 16 nëntor 2006

Fondacioni Gjerman IRZ (Fondacioni Gjerman për Bashkëpunimin Ligjor Ndërkombëtar) dhe Komisioni Europian organizuan në Dubrovnik, Kroaci, në datat 13 – 16 nëntor 2006, Konferencën Multilaterale me temë “Pavarësia e drejtësisë në Europë”, e cila adresoi aspekte dhe probleme të ndryshme lidhur me pavarësinë e drejtësisë në Europë. Në këtë veprimtari, Gjykata Kushtetuese e Shqipërisë u përfaqësua nga Prof. As. Dr. Xhezair Zaganjori dhe Zoti Petrit Plloçi, anëtarë të Gjykatës Kushtetuese.
 

Kongresi i 4-të i ACCPUF, 13 – 15 nëntor 2006

Nga data 13 deri me 15 nëntor 2006, zhvilloi punimet në Paris Kongresi i IV i ACCPUF-it (Shoqata e Gjykatave Kushtetuese që Përdorin Gjuhën Frënge), në të cilin morën pjesë kryetarë dhe përfaqësues nga 38 gjykata  kushtetuese anëtare të kësaj Shoqate. Në punimet e Kongresit morën pjesë Sekretari i Përgjithshëm i Organizatës Ndërkombëtare të Frëngjishtfolësve dhe z. G. Bukikio, Sekretar i Komisionit të Venecias. Delegacioni i Gjykatës Kushtetuese u kryesua nga z. Gjergji Sauli, Kryetar, dhe përbëhej nga  z. Kujtim Puto, gjyqtar, dhe z. Luan Pirdeni, drejtor. Rreth temës ‘Kompetencat e Gjykatës Kushtetuese”, që përbënte temën e këtij Kongresi, u paraqitën përvojat e gjykatave kushtetuese pjesëmarrëse dhe u zhvilluan debate për çështje aktuale të jurisprudencës së tyre. Gjatë punimeve, delegacioni i Gjykatës Kushtetuese diskutoi për disa çështje aktuale të vendimmarrjes së saj.

(Foto)
 

15-të vjetori i Gjykatës Kushtetuese të Federatës Ruse, 26 – 28 tetor 2006

Një delegacion i Gjykatës Kushtetuese të Shqipërisë i përbërë nga Dr. Gjergji Sauli, Kryetar i kësaj gjykate, Zoti Petrit Plloçi, anëtar, dhe Zonja Alma Çomo, drejtore e Marrëdhënieve Ndërkombëtare, mori pjesë në Konferencën Ndërkombëtare me temë “Hapësira e përbashkët ligjore europiane dhe praktika e drejtësisë kushtetuese”, e cila u organizua nga Gjykata Kushtetuese e Federatës Ruse, Komisioni i Venecias i Këshillit të Europës dhe Instituti për të Drejtën dhe Politikat Publike, në kuadër të programit të presidencës ruse në Komitetin e Ministrave të Këshillit të Europës. Kjo veprimtari u zhvillua në Moskë, Federata Ruse, në datat 26 – 28 tetor 2006. Tema kryesore e diskutimeve të kësaj konference ishte perspektiva e zhvillimit të hapësirës së përbashkët ligjore në Europë, mbi të gjitha në fushën e mbrojtjes së të drejtave dhe lirive themelore të njeriut.
 

Takimi Përgatitor i Rrethit të Kryetarëve, 6 – 8 shtator 2006 

Një delegacion i Gjykatës Kushtetuese i kryesuar nga Z.Alfred Karamuço, anëtar dhe i përbërë nga Z. Kujtim Osmani, Sekretar i Përgjithshëm dhe Z. Luan Pirdeni, Drejtor i Drejtorisë së Studimeve, mori pjesë në punimet e Rrethit të Kryetarëve të Konferencës së Gjykatave Kushtetuese Evropiane, të cilat u mbajtën  në Vilnius të Lituanisë në datën 7 shtator 2006. Në këtë takim morën pjesë përfaqësues nga 33 gjykata kushtetuese supreme. Në këtë Konferencë u shqyrtuan kërkesat e paraqitura për anëtarësim nga disa gjykata kushtetuese supreme. Gjatë qëndrimit në Vilnius delegacionet e gjykatave kushtetuese evropiane u pritën edhe nga Presidenti i Republikës së Lituanisë, z. Valdas Adamkus.(Foto)

(Foto)
 

15-të vjetori i Gjykatës Kushtetuese të Bullgarisë, 30 qershor – 1 korrik 2006  

Prof. As. Dr. Xhezair Zaganjori dhe Zoti Petrit Plloçi, anëtarë të Gjykatës Kushtetuese të Shqipërisë, morën pjesë në Ceremonitë dhe në Konferencën Ndërkombëtare me temë “Gjykata Kushtetuese në Shtetin Demokratik”, të cilat u organizuan me rastin e 15-të vjetorit të Gjykatës Kushtetuese të Bullgarisë në datat 30 qershor – 1 korrik 2006, Sofje, Bullgari. Pjesëmarrja në këto veprimtari ishte një eksperiencë e dobishme për Gjykatën Kushtetuese të Shqipërisë, pasi u njoh më nga afër me kontributin e rëndësishëm të Gjykatës Kushtetuese të Bullgarisë për rendin kushtetues dhe shtetin e së drejtës, për zhvillimin e një ekonomie moderne dhe të demokracisë në vend, për përfshirjen e Bullgarisë në proceset integruese Europiane dhe botërore.
 

Takimi i 5-të i Këshillit Mikst për Drejtësinë Kushtetuese, 13 – 15 qershor 2006

Në datat 15 e 16 qershor 2006, u mbajt në Budapest Mbledhja e Pestë e Këshillit mikst për drejtësinë kushtetuese të Komisionit të Venecias, në punimet e së cilës mori pjesë edhe nëpunësi ndërlidhës i Gjykatës. Mbledhja trajtoi probleme të bashkëpunimit midis gjykatave kushtetuese dhe Komisionit të Venecias për çështje të Forumit të Venecias, të bazës së të dhënave CODICES, të botimit të numrave të ardhshëm të Buletinit të Jurisprudencës Kushtetuese etj. Gjatë qëndrimit në Budapest, pjesëmarrësit u pritën në një takim të veçantë nga z. Lazlo Solyom, Presidenti Hungarisë.

(Foto)
 

Konferenca e 14-të Gjyqësore Ndërkombëtare, 17 – 19 maj 2006 

Me ftesë të Fondacionit të Familjes Furth, Gjykatës së Lartë të Republikës së Çekisë dhe të Fakultetit të Drejtësisë të Universitetit të Miçiganit, një delegacion i Gjykatës Kushtetuese të Shqipërisë i përbërë nga Dr. Fehmi Abdiu dhe Prof. As. Dr. Xhezair Zaganjori, anëtarë të Gjykatës Kushtetuese të Shqipërisë, dhe Zonja Alma Çomo, drejtore e Marrëdhënieve Ndërkombëtare, mori pjesë në punimet e Konferencës së 14-të Gjyqësore Ndërkombëtare me temë “Administrimi i sistemeve gjyqësore të mbingarkuara me çështje: Gjetja e ekuilibrave midis drejtësisë dhe ekonomisë gjyqësore”. Konferenca e këtij viti u zhvillua në Pragë, Republika e Çekisë, në datat 17 – 19 maj 2006.
 

50-të vjetori i Gjykatës Kushtetuese të Italisë – 22 prill 2006

Një delegacion i Gjykatës Kushtetuese të Shqipërisë i përbërë nga Dr. Gjergji Sauli, Kryetar i kësaj gjykate, dhe Zonja Vjollca Meçaj, anëtare, mori pjesë në ceremonitë zyrtare të organizuara me rastin e 50-të vjetorit të krijimit të Gjykatës Kushtetuese të Italisë. Këto ceremoni u zhvilluan në praninë e Presidentit të Republikës, Carlo Azeglio Ciampi, si dhe të personaliteteve të tjera të larta shtetërore në Romë, Itali, më 22 prill 2006.
 

Hapja e vitit gjyqësor 2006 – 20 janar 2006

Me ftesë të Zotit Luzius Wildhaber, Kryetar i Gjykatës Europiane të të Drejtave të Njeriut, Zoti Kristofor Peçi, anëtar i Gjykatës Kushtetuese të Shqipërisë, mori pjesë në ceremoninë për hapjen e vitit gjyqësor 2006 dhe në seminarin e organizuar me këtë rast, veprimtari të cilat u zhvilluan në Strasburg, Francë, më 20 janar 2006.

Vitit 2005

Bullgari

Vizitë pranë Gjykatës Kushtetuese të Bullgarisë

Me ftesë të z. Nedelko Beronov, Kryetar i Gjykatës Kushtetuese të Bullgarisë, një delegacion i Gjykatës Kushtetuese i kryesuar nga z. Gjergji Sauli, Kryetar, dhe i përbërë nga z. Alfred Karamuço, znj. Vjollca Meçaj, anëtarë, dhe z. Hajredin Fuga, këshilltar i Kryetarit, zhvilloi nga data 20 deri me 23 qershor 2005 një vizitë pune në Bullgari. Gjatë kësaj vizite, delegacioni  i Gjykatës Kushtetuese bëri disa takime pune me homologët bullgarë, gjatë të cilëve u shkëmbyen përvojat e të dy gjykatave në fushën e kontrollit kushtetues. Delegacioni u prit në takim të veçantë nga Presidneti i Republikës së Bullgarisë.

Kazakistan

Pjesëmarrje në Konferencë shkencore

Me ftesë të Z. Igor Rogov, Kryetar i Këshillit Kushtetues të Kazakistanit, znj. Vjollca Meçaj mori pjesë në Konferencën shkencore që u organizua nga ky Këshill në bashkëpunim me Komisionin e Venecias në kuadër të dhjetëvjetorit të Kushtetutës së këtij vendi. Konferenca u mbajt në Astana – Kazakistan në datat 30 e 31 gusht 2005.

Turqi

Simpozium dhe vizitë në Turqi

Me ftesë të z. Mutafa Bumin, Kryetar i Gjykatës Kushtetuese të Turqisë, një delegacion i Gjykatës Kushtetuese i përbërë nga z. F. Abdiu, gjyqtar dhe ish Kryetar i Gjykatës Kushtetuese, z. I. Shurdhi, shef i Kabinetit të Kryetarit, dhe z. Luan Pirdeni, Drejtor i Studimeve, bëri një vizitë zyrtare në Turqi. Sipas programit të vizitës, delegacioni mori pjesë në punimet e Simpoziumit me temë “Çështje të Harmonizimit të Kushtetutës Turke me Kushtetutën Evropiane”, i cili i zhvilloi punimet në Ankara nga data 28 deri me 30 prill 2005. Në punimet e simpoziumit morën pjesë gjyqtarë kushtetues, profesorë konstitucionalistë nga Turqia dhe vendet të ndryshme të Evropës. Në datat 1 dhe 2 maj 2005 delegacioni zhvilloi, sipas programit, vizita në Ankara dhe Stamboll.

SHBA

Vizitë në Shtetet e Bashkuara të Amerikës

Me ftesë të Advocate’s International, nga data 13 deri me 28 mars 2005, një delegacion i Gjykatës Kushtetuese i kryesuar nga z. Gjergji Sauli, Kryetar, dhe i përbërë nga z. Fehmi Abdiu, z. Kristofor Peçi, z. Xhezair Zaganjori, z. Petrit Plloçi, znj. Vjollca Meçaj, z. Sokol Sadushi, z. Kujtim Puto, anëtarë, dhe znj. Alma Çomo, drejtore e Marrëdhënieve Ndërkombëtare, zhvilloi një vizitë studimore në Shtetet e Bashkuara të Amerikës. Vizita ishte e  programuar në dy pjesë. Gjatë pjesës së parë vizita u zhvillua në Los Angeles – California, në datat 16 – 23 mars, 2005. Gjatë qëndrimit në Los Angeles, delegacioni shqiptar mori pjesë në një sërë veprimtarish, ku mund të përmenden Konferenca për Ndihmësat e Gjyqtarëve, vizita në Gjykatën e Distriktit për Distriktin Qëndror të Kalifornisë, si dhe vizita në Gjykatën e Lartë të Los Angeles. Pjesa e dytë e vizitës u zhvillua në Washington D.C., në datat 23 – 27 mars 2005. Gjatë qëndrimit në Washington, delegacioni shqiptar vizitoi Gjykatën e Lartë të Shteteve të Bashkuara të Amerikës, Gjykatën Federale të Pretendimeve, Qendrën Gjyqësore Federale, si dhe pati takime mjaft të rëndësishme me autoritete të lartë të sistemit gjyqësor ameriikan.  

Kiev – Ukraine

Veprimtari e Fondacionit të Familes Furth.

Me ftesë të z. Frederick Furth, drejtues i Fondacionit të Familjes Furth, një delgacion i Gjykatës Kushtetuese mori pjesë në punimet e Konferencës së XIII Gjyqësore Ndërkombëtare, që u mbajt në Kiev – Ukrainë, në datat 25 – 27 maj 2005. Delegacioni përbëhej nga znj. Vjollca Meçaj, anëtare, dhe znj. Arta Vorpsi, këshilltare. Në kuadër të punimeve të Konferencës, përfaqësues gjykatash të larta dhe kushtetuese të vendeve të ndryshme nga bota mbajtën tema dhe debatuan rreth temës qëndrore të pavarësisë së gjyqësorit dhe të rrugëve të forcimit të autonomisë së tij në vendet demokratike.

Qipro

Sipas Statutit të Konferencës së Gjykatave Kushtetuese Evropiane dhe me ftesë të z. Christos Artemides, Kryetar i Gjykatës Supreme të Qipros, një delegacion i Gjykatës Kushtetuese i kryesuar nga z. Gjergji Sauli, Kryetar, z. Kristofor Peçi, anëtar, dhe z. Luan Pirdeni, drejtor,  mori pjesë në punimet e Kongresit të XIII të Gjykatave Kushtetuese Evropiane, i cili u mbajt në Nikosia të Qipros nga data 15 deri me 19 maj 2005. Punimet e Kongresit të XIII të Gjykatave Kushtetuese Evropiane u fokusuan te tema “Kriteret e kufizimit të të drejtave të njeriut në praktikën e Gjykatës Kushtetuese.” Gjatë punimeve të Kongresit, delegacioni i Gjykatës Kushtetuese paraqitit kumtesën me temë “Kufizimet e të drejtave të njeriut në praktikën e Gjykatës Kushtetuese,” e cila u prit me interes të veçantë nga pjesëmarrësit. Në mbledhje të Rrethit të Kryetarëve të Gjyktave Kushtetuese Evropiane, me propozim të Gjykatës Kushtetuese të Lituanisë, u vendos që Kongresi i XIV të mbahet në Vilnius në vitin 2008.

Rumani

Nga data 31 maj deri me 1 qershor 2005 u mbajt në Bukuresht Konferenca e Kryetarëve të Gjykatave Kushtetuese anëtare të ACCPUF-it (Shoqata e Gjykatave Kushtetuese që përdorin edhe frëngjishten). Konferenca vendoi për çështje të pranimeve, për mbajtjen e Kongresit të ardhshëm dhe për temën e tij. Ndërkaq, Konferenca ballafaqoi përvojat e gjykatave kushtetuese anëtare rreth temës “Pavarësia e gjyqtarëve dhe e juridiksioneve”. Raporti sintezë i paraqitur në Konferencë përmendi edhe aspekte nga praktika e Gjykatës Kushtetuese në këtë fushë. Gjyqtari Kujtim Puto paraqiti temën mbi praktikën e Gjykatës Kushtetuese lidhur me kontrollin  kushtetues të vendimeve të KLD-së ose të Gjykatës së Lartë.

Spanje

Me ftesë të znj. Maria Emilia Casa Baamonde, Kryetare e Gjykatës Kushtetuese të Mbretërisë së Spanjës, një delegacion i Gjykatës Kushtetuese, i kryesuar nga z. Gjergji Sauli, Kryetar, dhe i përbërë nga z. Kujtim Puto, anëtar, mori pjesë në ceremonitë me rastin e 25 vjetorit të krijimit të saj, që u zhvilluan në Madrid me datë 12 korrik 2005. Gjatë qëndrimit në Madrid, delegacioni zhvilloi takime me homologë të gjykatave kushtetuese të vendeve evropiane.

Itali

Me ftesë të Ministrisë së Drejetësisë të Italisë, një delegacion me anëtarë nga institucionet kryesore të drejtësisë të vendit, në përbërje të të cilit ishte edhe z. Kristofor Peçi, anëtar i Gjykatës Kushtetuese, mori pjesë në takimin shumëpalësh të mbajtur në Romë në datat 25 deri me 28 shtator 2005. Tema qëndrore e takimit ishte ajo e pavarësisë së gjyqësorit në vendet në tranzicion, gjatë të cilit u zhvilluan shkëmbime përvojash midis delegacioneve të vendeve të tjera dhe përfaqësuesve më të lartë të gjyqësorit e të Gjykatës Kushtetuese të Italisë.

Sloveni, Komisioni i Venecias

Në datat 29 – 30 shtator 2005, në qytezën Bled të Slovenisë u mbajt Konferenca e III e Sekretarëve të Përgjithshëm të Gjykatave Kushtetuese, anëtare të Komsionit të Venecias, në të cilën muarën pjesë z. Kujtim Osmani, Sekretar i Përgjithshëm, i shoqëruar nga z. L. Pirdeni, drejtor. Konferenca bëri objekt debatesh e shkëmbimi përvoje çështje të tilla si organizimi i punës së këshilltarëve ligjorë pranë gjyqtarëve kushtetues, roli i teknologjisë së informacionit dhe marrëdhëniet e gjykatës me publikun. Kjo veprimtari u organizua në kuadër të Programit të përbashkët të gjykatave kushtetuese me Komisionin e Venecias.