Historiku

Ndryshimet demokratike që ndodhën në fillim të viteve ’90 shënuan kthesë rrënjësore në historinë e shtetit shqiptar dhe të institucioneve të tij. Në kuadër të këtyre ndryshimeve u krijua edhe Gjykata Kushtetuese, si një nga institucionet më të rëndësishme për garantimin e rendit të ri kushtetues që po instalohej në Shqipëri. Sipas kësaj baze kushtetuese Gjykata Kushtetuese përbëhej nga 9 anëtarë, 5 prej të cilëve zgjidheshin nga Kuvendi dhe 4 nga Presidenti i Republikës. Kryetari i Gjykatës Kushtetuese zgjidhej me votim të fshehtë nga vetë gjyqtarët. Ligji i mësipërm përcaktonte edhe statusin e gjyqtarëve kushtetues, kompetencat e atributet, subjektet që e vinin në lëvizje dhe fuqinë detyruese të vendimeve të saj. Anëtarë të Gjykatës Kushtetuese kanë qenë: Rustem Gjata (Kryetar i Gjykatës Kushtetuese 1992-1998), Manol Konomi, Feti Gjilani, Hilmi Dakli, Franc Jakova, Veli Budo, Thimjo Kondi, Natasha Sheshi, Ylvi Myrtja, Halil Kopani, Metush Saraçi, Hajredin Fuga, Bardha Selenica, Sabri Rrapi, Tefta Zaka. Anëtarët aktualë të Gjykatës Kushtetuese janë: Fehmi Abdiu (Kryetar prej 1998), Zija Vuci, Gjergj Sauli, Alfred Karamuço, Kristofor Peçi, Kujtim Puto, Sokol Sadushi dhe Petrit Plloçi.

Ka pasur polemika sa i përket çështjes së përtëritjes së përbërjes së Gjykatës Kushtetuese. Burim për këto polemika ka qenë interpretimi i ndryshëm që i bëhej dispozitave të ligjit kushtetues që rregullonte funksionimin e këtij institucioni. Gjithsesi rregullimi i ri kushtetues dhe ligjor bëri që të mënjanoheshin keqkuptimet lidhur me këtë çështje. Përtëritja e Gjykatës Kushtetuese bëhet tashmë në mënyrë të rregullt çdo tre vjet. Ligji kushtetues nr.7561, datë 29.04.1992 Për disa ndryshime e plotësime në ligjin nr.7491, datë 29.04.1991 Për dispozitat kryesore kushtetuese mbi bazë të të cilit u krijua dhe Gjykata Kushtetuese kërkonte nxjerrjen e akteve të tjera për rregullimin e veprimtarisë së saj. Më 15.07.1998 Kuvendi miratoi ligjin nr.8373 Mbi organizimin dhe funksionimin e Gjykatës Kushtetuese të Republikës së Shqipërisë, i cili krijoi një bazë ligjore për çështjet e veprimtarisë së Gjykatës Kushtetuese. Më 28.11.1998 hyri në fuqi Kushtetuta e Shqipërisë, në të cilën Gjykata Kushtetuese zuri përsëri një pozitë institucionale të rëndësishme. Gjithashtu ajo solli dhe ndryshime në mënyrën e caktimit të anëtarëve, të kompetencave dhe subjekteve që e vënë atë në lëvizje. Gjyqtarët emërohen nga Presidenti i Republikës me pëlqimin e Kuvendit. Kryetari emërohet nga Presidenti i Republikës me pëlqimin e Kuvendit për një periudhë 3-vjeçare me të drejtë riemërimi.

Kushtetuta kërkonte nxjerrjen e akteve ligjorë në zbatim të saj. Si rrjedhojë e kësaj, më 10.02.2000 Kuvendi miratoi ligjin nr.8577 Mbi organizimin dhe funksionimin e Gjykatës Kushtetuese të Republikës së Shqipërisë, i cili u hartua me ndihmën e Komisionit të Venecias “Demokracia përmes ligjit”. Ky ligj rregullonte çështje të tilla, si p.sh mënyrën e paraqitjes së kërkesës, shqyrtimin paraprak, proçedurat e gjykimit, statusin dhe mandatin e gjyqtarit. Në mënyrë të përmbledhur mund të themi se veprimtaria e Gjykatës Kushtetuese ndahet në dy periudha: periudha e parë përfshin kohën gjatë së cilës ajo ka funksionuar në bazë të Dispozitave Kryesore Kushtetuese, ndërsa periudha e dytë përfshin kohën pas hyrjes në fuqi të Kushtetutës së re dhe ligjit për Gjykatën Kushtetuese. Që nga krijimi i saj Gjykata Kushtetuese ka dhënë vendime të natyrave të ndryshme duke u shprehur për kushtetutshmërinë ose jo të normave ligjore apo akteve normative të institucioneve qendrore dhe vendore, interpretimin e Kushtetutës, parimet kushtetuese për një proces të rregullt ligjor. Një nga vendimet më të rëndësishme të saj ka qenë V-65/99, me anë të të cilit dënimi me vdekje i parashikuar nga Kodi Penal u shpall i papajtueshëm me Kushtetutën. Që prej krijimit të saj vëllimi i punës së kryer nga Gjykata Kushtetuese ka shënuar rritje të ndjeshme.

-         Çështje të gjykuara gjithsej në vitin ‘92…………………...12

-         Çështje të gjykuara gjithsej në vitin ’93...…………………13

-         Çështje të gjykuara gjithsej në vitin ’94...…………………11

-         Çështje të gjykuara gjithsej në vitin ’95...…………………16

-         Çështje të gjykuara gjithsej në vitin ‘96……………………46

-         Çështje të gjykuara gjithsej në vitin ‘97……………………62

-         Çështje të gjykuara gjithsej në vitin ‘98……………………79

-         Çështje të gjykuara gjithsej në vitin ‘99……………………67

-         Çështje të gjykuara gjithsej në vitin ‘00……………………96

-         Çështje të gjykuara gjithsej në vitin ’01..…………………213

-         Çështje të gjykuara gjithsej në vitin ’02…………………..237

-         Çështje të gjykuara gjithsej në vitin ’03…………………..39

-         Çështje të gjykuara gjithsej në vitin ’04…………………..20

-         Çështje të gjykuara gjithsej në vitin ’05…………………..41

-         Çështje të gjykuara gjithsej në vitin ’06…………………..30

-         Çështje të gjykuara gjithsej në vitin ’07…………………..45

-         Çështje të gjykuara gjithsej në vitin ’08…………………..24

fillimi i faqes