Mirësevini   

Si Kryetari i Gjykatës Kushtetuese të Republikës së Shqipërisë dëshiroj t’u uroj mirëseardhjen të gjithë atyre që vizitojnë këtë faqe interneti me qëllim që qytetarët, komuniteti i juristëve, mediat dhe çdo subjekt tjetër i interesuar të mund të jenë vazhdimisht në dijeni të të gjitha aktiviteteve dhe punës që zhvillon dhe ka zhvilluar kjo Gjykatë gjatë më shumë se 15 vjetëve të jetës së saj.

Ideja e krijimit dhe përditësimit të vazhdueshëm të faqes së internetit të Gjykatës Kushtetuese, duke e pasuruar atë me më shumë përmbajtje dhe me instrumente të rinj për kërkimin e informacionit, është në harmoni me nevojën e modernizimit të imazhit të drejtësisë kushtetuese për ta bërë atë më të afërt me qytetarët. Nëpërmjet vizitës virtuale në faqen tonë të internetit ju do të mund të njiheni më nga afër me mënyrën e organizimit dhe funksionimit të Gjykatës Kushtetuese, me vendimet e saj që prej vitit 1992 e deri te vendimet më të fundit, me bazën ligjore dhe kushtetuese të veprimtarisë së saj, me përbërjen aktuale dhe të dhëna për gjyqtarët, si dhe me rubrika të tjera që synojnë krijimin e një perceptimi sa më të plotë të një prej institucioneve më të larta shtetërore që garanton mbrojtjen dhe respektimin e Kushtetutës së Shqipërisë.

Për Gjykatën Kushtetuese transparenca e veprimtarisë së saj mbetet një angazhim konstant dhe ky është një prej motiveve më serioze të përpjekjeve tona për të përfshirë në këtë faqe interneti një informacion sa më të dobishëm, i cili do t’i vinte në ndihmë të gjithë vizitorëve që dëshirojnë ta konsultojnë atë, duke veçuar këtu mediat që, në pjesën më të madhe të rasteve, janë përcjellëset më të shpejta të vendimeve tona tek opinioni publik.

Dr. Vladimir Kristo
Kryetar i Gjykatës Kushtetuese
të Republikës së Shqipërisë