NJOFTIM

Sot më datë 17.11.2008, Kryetari i Gjykatës Kushtetuese të R.SH, Dr. Vladimir Kristo, priti në zyrën e tij zotin Hilmi Jashari, ushtrues i detyrës së Ombudspersonit në Republikën e Kosovës.

Gjatë vizitës u soll në vëmendje përvoja e legjislacionit dhe institucioneve shqiptare dhe më tej, biseda u fokusua në përpjekjet e Republikës së Kosovës për konstituimin e institucioneve kushtetuese dhe të pavarura pas hyrjes në fuqi të Kushtetutës së Kosovës.

Bashkëbiseduesit shprehën njëherësh nevojën e forcimit të bashkëpunimit mes institucioneve të R.SH dhe Republikës së Kosovës, bashkëpunim që merr rëndësi në marrëdhëniet mes dy popujve vëllezër si dhe frymëzohet nga  aspiratat e përbashkëta të dy vendeve drejt të nesërmes europiane.

Zoti Hilmi Jashari dhe delegacioni i tij u shoqërua në takim nga Avokati i Popullit të R.SH, z. Ermir Dobjani.

(FOTO)       (FOTO)

DEKLARATE

Gjykata Kushtetuese e Republikës së Shqipërisë u njoh me Progres Raportin 2007 të Komisionit Europian, publikuar në datën 6 nëntor 2007.

Gjykata Kushtetuese përshëndet Raportin e Komisionit Europian dhe, në mënyrë të veçantë, konsideratat e shprehura në raport për veprimtarinë e Gjykatës Kushtetuese, sipas të cilit “Vendimet e Gjykatës Kushtetuese kanë kontribuar në zhvillimin e jurisprudencës për decentralizimin, në rolin e komisioneve hetimore parlamentare, rolin e pushtetit ekzekutiv në raport me organet e pavarura shtetërore, si dhe në standardet për nxjerrjen e akteve normative të qeverisë.”

Ky vlerësim përbën një inkurajim për veprimtarinë e mëtejshme të kësaj Gjykate në mbrojtje të Kushtetutës, shtetit të së drejtës dhe lirive e të drejtave themelore të individit, duke kontribuar kështu krahas institucioneve të tjera kushtetuese në përafrimin sa më të shpejtë të Shqipërisë me strukturat euroatlantike.

NJOFTIM

Në mbledhjen e 1007 të Komitetit të Ministrave të Këshillit të Europës, datë 17 tetor 2007, është shqyrtuar edhe ecuria e procesit të ekzekutimit të vendimit “Qufaj kundër Shqipërisë” përsa i përket masave të përgjithshme të marra nga pala jonë në këtë drejtim.

Në këtë kuadër, Komiteti i Ministrave konstatoi me kënaqësi se Gjykata Kushtetuese “duke pasur parasysh efektet e vendimit konkret, e konsideron tashmë shqyrtimin e kërkesave për mosekzekutimin e vendimeve gjyqësore të formës së prerë brenda fushës së kompetencave të saj.”

Më poshtë paraqitet teksti i vendimit të Komitetit të Ministrave të Këshillit të Europës të marrë me këtë rast:

Vendim:

Pjesëmarrësit:

1. Konstatuan se shpërblimi i drejtë i akorduar për shoqërinë ankuese sa i takon dëmeve financiare dhe jo financiare, duke përfshirë edhe shumat e përmendura në vendimin e paekzekutuar, është paguar dhe se për këtë rast nuk është kërkuar marrja e ndonjë mase tjetër;
2. Konstatuan me interes se përsa i përket masave të përgjithshme, autoritetet po merren me hartimin e një sërë masash, veçanërisht në fushën legjislative, për të garantuar ekzekutimin e vendimeve gjyqësore kombëtare;
3. Konstatuan më tej me kënaqësi se Gjykata Kushtetuese, duke pasur parasysh efektet e vendimit konkret, e konsideron tashmë shqyrtimin e kërkesave për mosekzekutimin e vendimeve gjyqësore të formës së prerë brenda fushës së kompetencave të saj;
4. Konstatuan gjithashtu se shkelja ka ardhur kryesisht nga mungesa e fondit të nevojshëm në buxhetin e bashkisë;
5. Theksuan nevojën e marrjes së masave që kërkohen për parandalimin e shkeljeve të ngjashme dhe i ftuan autoritetet të jepnin më shumë informacion lidhur me këtë çështje;
6. Vendosën ta rimerrnin në konsideratë këtë çështje më së fundi deri në mbledhjen e dytë të Komitetit të Ministrave që do të zhvillohet në vitin 2008.

-          1 çështje kundër Shqipërisë

54268/00 Qufaj Co. Sh.p.k., vendim i datës 18/11/2005, marrë formë të prerë në 30/03/2005.