Te rejat
 

Veprimtari të zhvilluara në Shqipëri

10 maj 2007

Me ftesë të Gjykatës Kushtetuese të Shqipërisë ka ardhur për një vizitë dy ditore në Shqipëri një delegacion i Gjykatës Kushtetuese të Maqedonisë,  kryesuar nga kryetari i saj, z.Mahmut Jusuf. Vizita, është në kuadrin e takimeve bilaterale dhe konsultative mes dy institucioneve dhe u mbështet nga fondacioni gjerman në Shqipëri HANS HAIDEL. Në takimet dy ditore u shkëmbyen përvoja në fushën e drejtësisë kushtetuese dhe njëherësh u evidentuan dallimet dhe të përbashkëtat e gjykimit kushtetues në të dy vendet. Një pjesë e diskutimeve u orjentua dhe në aspektet e kontrollit individual të drejtësisë kushtetuese si pjesë e rëndësishme e punës së gjykatave kushtetuese.

Gjatë diskutimeve, kryetari i Gjykatës Kushtetuese të Republikës së Maqedonisë Mahmut Jusuf, e quajti mjaft të rëndësishme këtë vizitë. Ai shtroi nevojën e takimeve me të shpeshta dhe bashkëpunuese mes gjykatave kushtetuese të vendeve tona, si nevojë e diktuar dhe nga aspirata e përbashkët e Shqipërisë dhe Maqedonisë drejt BE.  “Takime të tilla do të na ndihmojnë jo vetëm të përsosim punën tonë mes shkëmbimit të eksperiencave cilësore, por dhe në përafrimin e legjislacioneve” u shpreh zoti M.Jusufi.

Pjesë e axhendës së ngjeshur ishte dhe takimi me Presidentin e Republikës A.Moisiu, ku u gjet e përbashkët ideja mbi rolin e rëndësishëm të gjykatave kushtetuese si garante të Kushtetutës. 

Në përfundim të vizitës dy ditore në Shqipëri, kryetari i Gjykatës Kushtetuese të Maqedonisë ftoi Kryetarin e Gjykatës Kushtetuese Shqiptare, zotit Gjergji Sauli për një vizitë në Republikën e Maqedonisë, në kuadrin e marrëdhënieve bilaterale të gjykatave kushtetuese në rajon e më gjerë.

04 mars 2004

Më datë 04.03.2004, në ambientet e Gjykatës Kushtetuese të Republikës së Shqipërisë, kryetari i saj, Z. Fehmi ABDIU, priti Z. Walter Shwimmer, Sekretar i Përgjithshëm i Këshillit të Evropës, i cili shoqërohej nga Ambasadori shqiptar pranë këtij organizmi, z. Shpëtim Çaushi.

    Gjatë takimit biseda mes të dy personaliteteve u fokusua tek pozicioni i Gjykatës Kushtetuese në situatën aktuale që po kalon vendi si dhe u trajtuan probleme që shqetësojnë sot drejtësinë shqiptare në përgjithësi dhe atë kushtetuese në veçanti. 

    Z. Abdiu bëri një prezantim të shkurtër të punës, problemeve dhe arritjeve të Gjykatës Kushtetuese për këto vitet e fundit si dhe një përshkrim të marrëdhënieve të këtij institucioni me institucionet e tjera të vendit, ndërsa Z. Shwimmer nga ana e tij, shprehu mbështetjen dhe konsideratën për rolin specifik që luan Gjykata Kushtetuese në drejtim të mbrojtjes dhe forcimit të shtetit ligjor, veçanërisht në periudhën e tranzicionit demokratik. (Foto )

26-27 nëntor 2003

U zhvillua në Tiranë, nën kujdesin e Presidentit të Republikës, Konferenca shkencore “Pesë vjet Kushtetutë- arritje dhe sfida” organizuar në bashkëpunim me Komisionin e Venecias, në të cilën muarrën pjesë ekspertë të huaj dhe vendas. Pas fjalës së hapjes të z. Fehmi Abdiu, Kryetar, Konferenca u përshëndet nga z.. Alfred Moisiu, President i Republikës, z. Fatos Nano, Kryeministër, dhe z. Gianni Buquicchio, Sekretar i Komisionit të Venecias. Në Konferencë u mbajtën kumtesa që synuan të evidentojnë arritjet e shënuara gjatë pesë vjet të zbatimit të Kushtetuese dhe vështirësitë e pengesat e hasura. Punimet e Konferencës u pasuan nga mbajtja e tryezës së rrumbullakët ku ekspertë vendas e të Komisionit të Venecias nxorrën në pah problemet e lindura gjatë vënies në jetë të Kushtetutës dhe shtruan për diskutim çështje të amendamenteve që mund t’i bëhen asaj në të ardhmen. (Foto)

4 korrik 2003

Gjykata Kushtetuese dhe fondacioni gjerman IRZ (Bashkëpunimi Ligjor Ndërkombëtar) organizuan në Tiranë seminarin me temë “Përzgjedhja e kërkesave individuale para Gjykatës Kushtetuese”. Në këtë seminar muarrën pjesë juristë të specializuar nga institucionet qëndrore, avokatë, gjyqtarë të Gjykatës Kushtetuese, pedagogë të Fakultetit të Drejtësisë etj. Ekspertë e lektorë, gjermanë e shqiptarë, pasi paraqitën kontributet e tyre, shkëmbyen mendime lidhur me kriteret e përzgjedhjes së kërkesave para Gjykatës Kushtetuese.

15-16 maj 2003

Me ftesë të Gjykatës Kushtetuese të Maqedonisë, u mbajt në Ohër-Maqedoni, nën kujdesin e Presidentit B. Trajkovski, takimi i parë i gjyqtarëve kushtetetues shqiptarë e maqedonas. Takimi i shërbeu njohjes së ndërsjelltë të komptencave, organizimit e veprimtarisë të Gjykatave Kushtetuese të të dy vendeve. Në takim muarrën pjesë Kryetari, gjyqtarët, Sekretari i përgjithshëm dhe Këshilltari i Kryetarit.

Pas dy muajsh, në shkëmbim të këtij takimi, gjyqtarët kushtetues shqiptarë e maqedonas zhvilluan takimin e dytë të tyre në Tiranë e Durrës. Gjatë qëndrimit në Tiranë, delegacioni i gjyqtarëve kushtetues maqedonas u prit nga Presidenti i Republikës Alfred Moisiu. Në takimin e zhvilluar në Durrës u shkëmbyen përvojat lidhur me strukturat dhe organizimin e punës vendimmarrëse të gjykatave të të dy vendeve. (Foto)

28-29 prill 2003

Gjatë vitit 2003 Gjykata ka bashkëpunuar me Komisionin e Venecias në shumë drejtime. Kështu në fund prillit 2003 u mbajt në Tiranë seminari me temë “Ekzekutimi i vendimeve të Gjykatës Kushtetese”, në të cilin muarrën pjesë ekspertë të huaj e vendas, përfaqësues të institucioneve kryesore kushtetuese, juristë të pavarur, përfaqësues të OJQ, gjyqtarë etj. Seminari trajtoi problemet që kanë lindur në fazën e ekzekutimit të vendimeve të Gjykatës Kushtetuese. Ai luajti rol në sensibilizimin e pjesëmarrësve për respektimin e detyrimeve kushtetuese nga çdo institucion. (Foto)

10-11 shkurt 2003

Z. Fehmi Abdiu, Kryetar, dhe z. Ditmir Bushati, këshilltar, muarrën pjesë në punimet e Konferencës së pestë për Reformën gjyqësore në kuadër të Planit të dytë të veprimit me Këshillin e Evropës, organizuar nga ky Këshill dhe Ministria e Punëve të Jashtme dhe që i zhvilloi punimet në Sarandë. Konferenca bëri bilancin e realizimit të reformës gjyqësore në bashkëpunim me Këshillin e Evropës dhe caktoi objektivat e Planit të dytë të Veprimit. Në këtë Konferencë, Kryetari Abdiu informoi pjesëmarrësit për realizimet në kuadër të Planit të Dytë të Veprimit, në pjesën e tij për Gjykatën Kushtetuese, dhe sensibilizoi pjesëmarrësit për domosdoshmërinë e ekzekutimit të vendimeve të Gjykatës Kushtetues si një nga objektivat e Reformës, dhe konkretisht ndërtimi i shtetit të së drejtës.

Pjesëmarrje në veprimtari jashtë shtetit

22 janar 2004

Z. Zija Vuci, gjyqtar, dhe z. Ditmir Bushati, këshilltar, muarrën pjesë në ceremoninë e përurimit të vitit të ri gjyqësore 2004 të Gjykatës Evropiane të të Drejtave të Njeriut. Gjatë kësaj veprimtarie, ata bënë një vizitë në Bibliotekën e të Drejtave të Njeriut, ku u paraqit një ekspoze mbi të rejat e Gjykatës në fushën e teknologjisë së informacionit. Pastaj, ata muarrën pjesë në një mbledhje pune joformale lidhur me procesin e reformës që parashikohet t’i bëhet sistemit të Konventës, në të cilën muarrën pjesë gjyqtarë dhe ekspertë qeveritarë.

17-19 nëntor 2003

Zhvilloi punimet në Paris seminari i tretë i korrespondentëve kombëtarë të gjykatave kushtetuese, anëtare të ACCPUF-it (Shoqata e Gjykatave Kushtetuese që përdorin edhe Gjuhën Frënge). Në seminar muarrën pjesë korrespondentët kombëtarë të gjykatave kushtetuese, anëtare të ACCPUF-it, drejtues të Këshillit Kushtetues Francez, përfaqësues të Agjencisë Ndërqeveritare të Frankofonisë. Qëllimi i kësaj veprimtarie ishte ballafaqimi i përvojave të gjykatave kushtetuese në periudhat parazgjedhore, zgjedhore dhe paszgjedhore. Z. Kujtim Puto, gjyqtar, përfaqësoi Gjykatën Kushtetuese në këtë veprimtari.

4-6 nëntor 2003

Me ftesë të Këshillit Kushtetues Francez, një delegacion i Gjykatës Kushtetuese i përbërë nga z. Fehmi Abdiu, Kryetar, z. Gjergji Sauli, z. Kristofor Peçi, z. Sokol Sadushi, z. Xhezair Zaganjori, gjyqtarë, dhe nga z. Luan Pirdeni, drejtor, zhvilloi një vizitë studimore njëjavore pranë atij Këshilli. Gjatë vizitës u shkëmbyen përvojat e të dy institucioneve, u diskutuan çështje me interes të përbashkët, veçanërisht ato që lidhen me kontrollin kushtetues paraprak. Delegacioni asistoi në një seancë në Asamblenë Kombëtare, u prit në Gjykatën e Kasacionit etj. Vizita i shërbeu forcimit të marrëdhënieve të bashkëpunimit të të dy institucioneve dhe hodhi bazat për takime të tjera në të ardhmen.

16-18 tetor 2003

Në Nikozia të Qipros u mbajt mbledhja e Rrethit të Kryetarëve për  përgatitjen e Kongresit të XIII të Gjykatave Kushtetuese Evropiane, në të cilën muarr pjesë një delegacion i Gjykatës Kushtetuese i kryesuar nga z. Fehmi Abdiu, Kryetar, z. Kujtim Osmani, Sekretar i Përgjithshëm, dhe z. Luan Pirdeni, drejtor. Rrethi i Kryetarëve shqyrtoi kërkesat për pranimet e reja në këtë organizatë dhe miratoi rezolutat përkatëse për to. Në mbledhje u disktua dhe u debatua gjallërisht për caktimin e temës së Kongresit të ardhshëm të kësaj organizate dhe në përfundim u miratua tema e propozuar nga delegacionii Gjykatës Kushtetuese të Armenisë “Mbi kriteret e kufizimit të të drejtave të njeriut në veprimtarinë vendimmarrëse të gjykatës kushtetuese”. Mbledhja e Rrethit të kryetarëve vendosi që Kongresi i XIII të mbahet në Nikozia të Qipros në datat 15-19 maj 2005. (Foto)

8 korrik 2003

Sipas planit të bashkëpunimit me Komisionin e Venecias për organizimin e një konference shkencore në kuadër të  pesëvjetorit të hyrjes në fuqi të Kushtetutës, një delegacion i Gjykatës Kushtetuese i përbërë nga z. Fehmi Abdiu, Kryetar, dhe z. Luan Omari, zëvendëskryetar i Komisionit, zhvilloi në Strasburg me datë një takim me z. Gianni Buquicchio, Sekretar i Komisionit të Venecias, ku u diskutua për tematikën, ekspertët, pjesëmarrësit dhe sponsorizimin e veprimtarisë. 

18-20 qershor 2003

Një delegacion i Gjykatës Kushtetuese i përbërë nga z. Fehmi Abdiu, Kryetar, z. Kujtim Puto, gjyqtar, dhe nga z. Luan Pirdeni, drejtor, muarr pjesë në punimet e Kongresit të III të ACCPUF-it (Shoqata e Gjykatave Kushtetuese që përdorin edhe Gjuhën Frënge), i cili i zhvilloi punimet në Ottawa-Kanada. Gjykata Kushtetese është anëtare me të drejta të plota në këtë Shoqatë që nga janari vitit 2002. Kongresi u parapri nga mbledhja e Asamblesë së Përgjithshme të Shoqatës, e cila diskutoi dhe vendosi për pranimet e reja, miratoi amendamentet ndaj Statutit, përdorimin e buxhetit për vitin 2002 dhe gjendjen e financave të saj për vitin 2003. Tema e Vëllazërimit ishte objekt i referatit kryesor, kumtesave, diskutimeve dhe debateve të zhvilluara gjatë tre ditëve të Kongresit të Tretë të kësaj Shoqate. Raporti i dërguar nga Gjykata Kushtetuese u përfshi në raportin e përgjithshëm të hartuar nga organizatorët. (Foto)

13-14 qershor 2003

Kryetari i Gjykatës Kushtetuese, z. Fehmi Abdiu, i shoqëruar nga zj. Alma Trebeshina, specialiste, muarr pjesë në punimet e Sesionit të 55 të Komisionit të Venecias që u mbajt në Venecia me. Gjatë punimeve të këtij Sesioni, zotit Antonio La Pergola, Kryetar i Komisionit të Venecias, iu dorëzua dekorata e akorduar nga Presidentit të Republikës me motivacionin e kontributit për zhvillimin e reformës kushtetuese në Shqipëri.

21-23 maj 2003

Në Washington zhvilloi punimet Konferenca e 11 Gjyqësore Ndërkombëtare me temë “Gjykatat e Apelimit të Fundit- forcimi i pavarësisë së gjyqësorit” organizuar nga Qendra amerikane për Demokraci. Në këtë veprimtari Gjykata u përfaqësua me një delegacion të kryesuar nga z. Fehmi Abdiu, Kryetar, dhe z. Sokol Sadushi, anëtar, të shoqëruar nga zj. Alma Trebeshina, specialiste. Edhe këtë rradhë, Konferenca u përqëndrua në çështjet e forcimit të pavarësisë në procesin vendimmarrës të gjykatave kushtetuese, të gjykatave të larta e të institucioneve të tjera si instanca të apelimit të fundit. (Foto)

8-9 maj 2003

Zhvillohet në Oslo Mbledhja e dytë e Këshillit Mikst për drejtësinë kushtetuese i Komisionit të Venecias (takimi i nëpunësave ndërlidhës), në të cilën muarr pjesë nëpunësi ndërlidhës i Gjykatës, z. Luan Pirdeni. Në mbledhje u trajtuan çështjet e bashkëpunimit midis gjykatave kushtetuese anëtare të Komisionit të Venecias (Forumi i Venecias), ato të nxjerrjes së buletinit të jurisprudencës kushtetuese, të përditësimit të bazës të të dhënave CODICES, të mënyrave të kërkimit të të dhënave etj.

1-3 maj 2003

Një delegacion i Gjykatës Kushtetuese, i përbërë nga z. Fehmi Abdiu, Kryetar, dhe z. Xhezair Zaganjori, gjyqtar, muarr pjesë në punimet e Kongresit të II të juristëve evropianë, i cili i zhvilloi punimet në fillim të majit 2003 në Athinë. Në Kongres muarrën pjesë juristë nga vendet evropiane si gjyqtarë, prokurorë, avokatë, konstitucionalistë, studiues e profesorë, specialiste të së drejtës evropiane etj. Kongresi i fokusoi punimet në trajtimin e problemeve më të mprehta evropiane të kohës tonë të tilla si ai i lëvizjes së lirë të njerëzve, mallrave e kapitalit, ai i luftës kundër krimit të organizuar e terrorizmit, ai i kartës të të drejtave themelore dhe i kushtetutës evropiane etj. I mbajtur në tri panele kreysore, Kongresi vuri theksin te roli i juristëve në përballimin e sfidave aktuale dhe perspektive.

25-27 prill 2003

Gjyqtari Gjergji Sauli muarr pjesë në punimet e Konferencës Rajonale për punën e sistemit gjyqësor, oganizuar nga Këshilli për Mbrojtjen e të Drejtave e të Lirive të Njeriut të Kosovës dhe që u mbajt në Prishtinë. Në Konferencë u shkëmbyen përvojat e Kosovës, Shqipërisë dhe Maqedonisë lidhur me organizimin dhe funksionimin e pushtetit gjyqësor. Në konferencë muarrën pjesë përfaqësues të gjyqësorit, të organizatave joqeveritare në fushë të të drejtave të njeriut, profesorë të së drejtës etj.

15-22 mars 2003

Në kuadër të bashkëpunimit me fondacionit gjerman IRZ (Bashkëpunimi Ligjor Ndërkombëtar), zj. Arta Vorpsi, drejtore e Studimeve dhe Botimeve, dhe z. Denar Biba, drejtor për Marrëdhëniet me Mediat dhe Publikun, zhvilluan një vizitë studimore njëjavore pranë disa gjykatave federale gjermane. Gjatë kësaj vizite ata u asistuan nga zj. Anne Rieddel, drejtuese e Qëndrës për Informimin dhe Komunikimin “ARIADNE. Pjesëmarrësit u njohën përvojën gjermane për teknikat e formulimit të njoftimit, mënyrat e dhënies së intervistës, organizimi i konferencës për shtyp etj.